F1 | Kryesore

Verstappen mundi Russell për “pole position” në Katar

30 Nëntor 2024 | 20:55

Katër herë kampioni i Botës rradhazi, Max Verstappen surprizoi me “pole position” në “Qatar Grand Prix”.

Hollandezi la pas shqetësimet e garës Sprint për të mundur George Russell në momentet e fundit të sesionit të 3 kualifikues me vetëm 0.055”. Britaniku tjetër, Lando Norris u rendit në vendin e 3.

Pas ndryshimeve të shpeshta në dy sesionet e para, Russell siguroi një “pole” provizor në startin e sesionit të 3. Por Verstappen gjeti forcën dhe shpejtësinë e nevojshme për të vendosur të parin “pole position” prej garës së Austrisë në Qershor.

Në përfundim u pa se si Verstappen në xhiron e kthimit në bokse ndaloi në trajektoren e Russell duke e penguar të përmirësonte kohën e Red Bull.

Norris do të niset nga vendi i 3 duke ndarë rradhën e dytë me shokun e skuadrës te McLaren, Oscar Piastri. Ferrari i Charles Leclerc u ngjit në vendin e 5 përpara Lewis Hamilton në të 6 për Mercedes.

Carlos Sainz e vendosi Ferrari-n e tij në vendin e 7 i ndjekur nga patrioti Fernando Alonso që e renditi Aston Martin në rradhën e 4 të nisjes. Sergio Perez me Red Bull dhe Haas i Kevin Magnussen plotësuan top 10.