Veteranët e UÇK-së: Ne kërkojmë drejtësi, LVV po përpiqet të politizojë protestën

Veteranët e UÇK-së kanë reaguar lidhur me deklaratat e Lëvizjes Vetëvendosje teksa thekson se LVV po përpiqet të politizojë dhe të zbehë qëllimin e protestës që do të zhvillohet nesër në Tiranë.

Sipas tyre protesta është zëri i popullit dhe nuk është i asnjë partie politike. Veteranët theksojnë se kërkojnë drejtësi për krerët e UÇK-së dhe ndëshkim të krimeve të serbëve. Ata gjithashtu kanë falenderuar kryeministrin Edi Rama që ka qenë mbështetës i kësaj kauze.

“Deklarata e Lëvizjes Vetëvendosje, e lëshuar mbrëmë vonë, tregon qartë se kjo parti po përpiqet të politizojë dhe të zbehë qëllimin e protestës së madhe që do të mbahet në Tiranë më 17 tetor.

Kjo protestë nuk është e asnjë partie politike- ajo është zëri i popullit shqiptar, zëri i veteranëve, i familjeve të dëshmorëve dhe i gjithë atyre që nuk pajtohen me padrejtësinë që po u bëhet krerëve të UÇK-së në Hagë.

Nuk ka forcë politike që mund ta ndalë apo ta përvetësojë këtë zë. OVL UÇK nuk lejon dhe nuk do të lejojë që lufta e shenjtë e Ushtrisë Çlirimtare të Kosovës të përdoret për interesa partiake.

Ne nuk kërkojmë retorikë politike, kërkojmë drejtësi për luftëtarët tanë dhe ndëshkim për krimet e Serbisë. Protesta e Tiranës është protestë e kombit, jo e partive. Aty do të jenë mijëra shqiptarë nga të gjitha trojet, për të treguar se UÇK-ja është nderi i kombit dhe s’ka gjykatë që mund ta njollosë atë.

Në të njëjtën kohë, OVL UÇK shpreh falënderim të sinqertë për Kryeministrin e Shqipërisë, z. Edi Rama, i cili është treguar zë i qartë dhe mbështetës i kësaj kauze të drejtë, si dhe për institucionet shqiptare që kanë dhënë mbështetje të plotë për mbarëvajtjen dhe organizimin e protestës në Tiranë”, shkruhet në reagim.