Vishaj: Vrasësin e shtatzënës e pret burgimi i përjetshëm sado që të arratiset

Avokati Saimir Vishaj deklaroi se Sokol Halili, i cili vrau ish-bashkëshorten e tij shtatzënë në oborrin e Klinikës së Gjinekologjisë në Prishtinë, nuk ka shpëtim nga burgu.

“Nuk ka rëndësi, ai mund të fshihet për 1 ditë, 1 muaj, 2 muaj, por çelësat e burgut e presin dhe ka një dënim shumë të ashpër deri në burgim të përjetshëm,” – u shpreh Vishaj.

Avokati tha se ajo që ndodh në Kosovë, ndodh edhe në Shqipëri, por çfarë lë shije të hidhur është se pasi gjykata lëshon urdhrin e mbrojtjes, vetë viktima është e detyruar ta çojë urdhrin e mbrojtjes në polici.

Vishaj deklaroi se vrasja e një gruaje shtatzënë është një nga veprat më të rënda të kodit penal.

Mbrëmjen e së mërkurës, Sokol Halili vrau ish-bashkëshorten e tij shtatzënë në oborrin e Klinikës së Gjinekologjisë në Prishtinë. Gruaja, siç është raportuar, do të sillte në jetë fëmijën brenda këtyre ditëve.

Policia e Kosovës ka kërkuar nga qytetarët informacione të cilat do të ndihmonin në arrestimin e autorit, i cili ende ndodhet në arrati.

LEXONI GJITHASHTU:

• Sot varroset gruaja shtatzënë që u vra nga ish-bashkëshorti
• “Dorëheqja nuk mjafton”, protestë në Prishtinë për vrasjen e gruas shtatzënë