“Vizita e Melonit, normale”- Baçi: Marrëveshja për emigrantët drejt ekzekutimit

Analisti Agim Baçi është shprehur se vizita e ditës së nesërme të kryeministres italiane Giorgia Meloni në kampin e refugjatëve që po ndërtohet në Gjadër është një vizitë normale e një pune që është diskutuar gjatë në të dy shtetet.

Komentet Baçi i bëri në Euronews Albania, ku tha se të dy kryeministrat, Edi Rama dhe Giorgia Meloni, janë të predispozuar që të tregojnë se marrëveshja për emigrantët është drejt ekzekutimit të saj.

Ai tha gjithashtu se kryeministrit Edi Rama nuk i intereson imazhi i tij në Itali, por i intereson imazhi te shqiptarët në vendin tonë, të cilët janë edhe votues.

“Pas marrëveshjes dhe miratimit nga Gjykata Kushtetuese është një vizitë normale e një pune që është debatuar goxha edhe në Shqipëri edhe në Itali. Të dy kryeministrat janë të predispozuar që të tregojnë që ajo marrëveshje mes tyre është drejt ekzekutimit të saj.

Është një vizitë e duhur që i shërben këtij procesi. Pastaj të dy kryeministrat do të jenë përballë shumë pyetjeve të gazetarëve, sidomos pas emisionit investigativ. Pas emisionit të parë në Shqipëri kanë ardhur deputetë italianë, gazetarë italianë, etj.

Rama nuk është i interesuar nëse i përmirësohet imazhi apo jo në Itali. Ai çdo gjë e bën për publikun dhe votuesin shqiptar. Ai edhe në reagimin pas emisionit Rai3, tentonte ta shihte këtë si një goditje ndaj Shqipërisë dhe jo ndaj qeverisë së tij”, tha Baçi.

LEXONI GJITHASHTU:

• “Marrëveshja po ecën përpara”- Meloni për RAI 3: Rama u sulmua padrejtësisht
• Debati për zgjedhjet evropiane, Von der Leyen i mëshon aleancës me Giorgia Melonin