Vota e emigrantëve, Celibashi: Nëse nuk plotësohet boshllëkun ligjor, s’ka votim

Kur na ndajnë më shumë se 1 vit nga zgjedhjet e ardhshme parlamentare, komisioneri shtetëror i zgjedhjeve, Ilirjan Celibashi kërkoi nga partitë politike që të bëjnë ndryshimet në kodin zgjedhor për të mundësuar votën shqiptarëve që jetojnë dhe punojnë jashtë vendit.

Celibashi paralajmëroi mundësinë e mos realizimit të votës së emigrantëve.

“Nëse Kuvendi i Shqipërisë nuk plotëson boshllëkun ligjor sipas urdhrit të gjykatës kushtetuese, nuk mund të zhvillohet votimi nga jashtë”, tha  Celibashi.

Edhe njëherë tjetër, Celibashi i bëri thirrje politikës për të ndryshuar kodin zgjedhor në komisionin e posaçëm te reformës zgjedhore i cili ka rinisur punën këtë fillim viti.

“Nëse do të ngelet ky kod zgjedhor që është në fuqi natyrisht që zgjedhjet do të bëhen, nuk di të them se çfarë impakti do të ketë në lidhje me standardin teknik të zgjedhjeve të ardhshme. Do të ishte mirë që partitë politike, shumica qeverisëse dhe opozita të angazhohen për t’i realizuar këto ndryshime sa më shpejt të jetë e mundur”, u shpreh kryekomisioneri.

Komisioni Qendror i Zgjedhjeve ka propozuar që votimi elektronik të shtrihet të 5 qarqe. Për këtë, pret dritën jeshile nga qeveria për miratim brenda fundit të muajit shkurt, pasi në të kundërt nuk do të zhvillohet.

LEXONI GJITHASHTU:

• Vijon mandatin kryebashkiaku i Kuçovës, Celibashi: S’ka shkak ligjor për shkarkim
• Celibashi për votën e Diasporës: S’ka më kohë! Partitë duhet të vendosin tani