Votimi i ligjit për zonat e mbrojtura, delegacioni i BE: Duhet konsultim publik

Delegacioni i Bashkimit Europian në Shqipëri ka reaguar pas miratimit në Parlament të ligjit për zonat e mbrojtura.

Përmes një postimi në rrjetin social “X”, delegacioni i BE thotë se BE do të ndjekë me shumë vëmendje zbatimin e dispozitave të reja ligjore për zonat e mbrojtura, sipas kuadrit ligjor të BE-së për mbrojtjen e mjedisit dhe angazhimet ndërkombëtare të Shqipërisë.

Po ashtu në njoftim thuhet se në kuadrin e nëgociatave të anëtarësimit, ku legjislacioni shqiptar duhet të përafrohet me standartet europiane, duhet që miratimi i ligjeve mbi çështje që mbulohen nga legjislacioni i BE të bëhet me konsultim të gjerë publik.

“Rruga e Shqipërisë drejt anëtarësimit në Bashkimin Evropian është e qartë. Ajo kërkon përpjekje të vazhdueshme nga qeveria dhe parlamenti për të siguruar që legjislacioni shqiptar të përafrohet me standardet evropiane.

Në kuadrin e negociatave të anëtarësimit, miratimi i ligjeve mbi çështje që mbulohen nga legjislacioni i BE-së presupozon konsultim publik të mirëfilltë dhe gjithëpërfshirës, si dhe një proces të parashikueshëm dhe transparent.

Delegacioni i BE-së do të ndjekë me shumë vëmendje zbatimin e dispozitave të reja ligjore për zonat e mbrojtura, sipas kuadrit ligjor të BE-së për mbrojtjen e mjedisit dhe angazhimet ndërkombëtare të Shqipërisë”, shkruan delegacioni i BE.

LEXONI GJITHASHTU:

• Organizatat mjedisore lajmërojnë protesta kundër ligjit për “Zonat e Mbrojtura”
• Tabaku: Ligji që u kalua parashikon investime strategjike në zonat e mbrojtura