Presidenti serb Aleksandër Vuçiç i kërkoi homologut të tij turk Rexhep Taip Erdogan në një bisedë telefonike që ta ndihmojë Serbinë për të stabilizuar paqen në rajonin e Ballkanit.

“Presidenti turk Erdogan pyeti për situatën aktuale në Kosovë dhe Presidenti Vuçiç e informoi atë për ngjarjet që çuan në përshkallëzimin e dhunës. Ai gjithashtu i kërkoi kreut  të shtetit turk që të përdorë reputacionin dhe ndikimin e vendit të tij për të ruajtur paqen dhe stabilitetin në rajon”, tha shërbimi për shtyp i presidentit serb.

“Presidenti Vuçiç e ftoi presidentin Erdogan të vizitojë Serbinë”, thuhet në deklaratë. Pala serbe thotë se Vuçiç e uroi Erdoganin për fitoren e tij në zgjedhjet presidenciale të mbajtura në Turqi, “duke i uruar që ta udhëheqë vendin me sukses në rrugën e zhvillimit dhe gjatë këtij mandati”.

“Me këtë rast, presidenti Vuçiç theksoi se Turqia është një partner jashtëzakonisht i rëndësishëm për Serbinë, jo vetëm në marrëdhëniet dypalëshe, por edhe në arenën politike ndërkombëtare”, thuhet në deklaratë.

Ministria e Jashtme turke tha të hënën se ishte e shqetësuar për përkeqësimin e situatës në veri të Kosovës dhe u bëri thirrje palëve të shmangin hapat që mund të çojnë në përshkallëzim të mëtejshëm të tensioneve në rajon.

LEXONI GJITHASHTU:

• U arrestuan gjatë përleshjeve në Zveçan, vendoset masa e sigurisë për 2 serbët
• “Hakmerret” Gjermania, vendos mbylljen e 4 nga 5 konsullatave ruse