Zbardhen detajet e aksidentit në Kamenicë, 76-vjeçari përplas nënë e bir me makinë, 3-vjeçari nuk i mbijeton plagëve

Policia e Shtetit ka dalë me një njoftim zyrtar lidhur me aksidentin e rëndë të regjistruar në aksin rrugor Korçë–Ersekë, në fshatin Kamenicë, ku humbi jetën një i mitur.

Sipas njoftimit, rreth orës 16:30 të kësaj të premte, automjeti tip “Nissan”, me drejtues shtetasin Sh. V., 76 vjeç, ka përplasur dy këmbësorë, nënë e bir, shtetasen Sh. M., rreth 44 vjeçe, dhe djalin e saj të mitur, rreth 3 vjeç.

Si pasojë e aksidentit, fëmija ka ndërruar jetë në spital, ndërsa nëna e tij po merr ndihmë mjekësore dhe ndodhet jashtë rrezikut për jetën.

Menjëherë pas ngjarjes, specialistët e Sektorit të Qarkullimit Rrugor kanë shoqëruar në Komisariat drejtuesin e automjetit, shtetasin Sh. V., 76 vjeç, për kryerjen e veprimeve procedurale.

Ndërkohë, grupi hetimor ndodhet në vendngjarje dhe po punon për zbardhjen e plotë të rrethanave të aksidentit.