Zbardhet atentati i ndodhur në Shkodër dy ditë më parë, arrestohet në Berlin autori

Është zbardhur atentati i ndodhur në Shkodër dy ditë më parë ku u qëllua me breshëri plumbash ndaj shtetasit Selami Brahimi.

Hetimet e kryera nga policia dhe prokuroria e Shkodrës bën të mundur identifikimin e autorit të ngjarjes i cili është shtetasi me inicialet Sulejman Kapllani, 68 vjeç, banues në lagjen “Guerile”, Shkodër.

Pas ngjarjes u pa se 68-vjeçari ishte larguar nga Shqipëria në drejtim të Gjermanisë, ku falë bashkëpunimit përmes Interpolit u arrestua në qytetin e Berlinit.

Selami Brahimi u qëllua teksa ndodhej brenda automjetit “Citroen C3”. Në dëshminë e tij për policinë Brahimi ka mohuar që të ketë konflikte më ndonjë person dhe theksoi se nuk mundi t’i shihte dot autorët pasi u kap në befasi.

Selami Brahimi rezulton të jetë shok i afërt pjesëtarë të fisit Lici në Shkodër.

Pritet ekstradimi i autorit dhe vijimi i hetmeve për të hedhur dritë mbi motivet e ngjarjes.

“Falë bashkëpunimit dhe shkëmbimit të informacionit ndërmjet Interpol Tiranës dhe Interpol Wiesbaden, u bë i mundur lokalizimi, kapja dhe arrestimi me qëllim ekstradimin drejt Shqipërisë, i autorit të dyshuar të kësaj ngjarjeje.

Në vijim të hetimeve të thelluara për zbardhjen e rrethanave të rastit, si dhe për identifikimin dhe kapjen e autorit të plagosjes së shtetasit S. B., të kryer më datë 08.02.2024, strukturat hetimore të Drejtorisë Vendore të Policisë Shkodër, në bashkëpunim me Prokurorinë, bazuar në provat dhe në informacionet e siguruara, identifikuan dhe shpallën në kërkim autorin e  dyshuar, shtetasin S. K.

Si rezultat i një hetimi intensiv dhe profesional të kryer nga strukturat hetimore të DVP Shkodër, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Shkodër, dhe falë inteligjencës policore, u sigurua informacion se autori i dyshuar kishte udhëtuar drejt Berlinit.

Në kuadër të një operacioni të përbashkët,  të koduar “Koordinimi”, të kryer në bashkëpunim me Interpolin dhe me homologët gjermanë, është kapur në qytetin e Berlinit, Gjermani, i shpalluri në kërkim ndërkombëtar shtetasi S. K., 68 vjeç, banues në lagjen “Guerile”, Shkodër.

Shtetasi S. K. dyshohet si autori kryesor i ngjarjes së datës 08.02.2024, në Shkodër, ku ka qëlluar me armë zjarri në drejtim të automjetit të markës “Citroen”, për të vrarë shtetasin S. B., banues në lagjen “Guerile”, Shkodër.

Ndaj shtetasit S. K., Prokuroria kishte lëshuar një urdhër ndalimi për veprat penale “Vrasja me paramendim”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe municionit”.

Sqarojmë se strukturat kundër krimeve të rënda të DVP Shkodër kanë sekuestruar në cilësinë e provës materiale, armën me të cilën është ekzekutuar vepra penale, një AK-47, së bashku me krehra me fishekë, si dhe automjeti i përdorur për transportimin e autorit.

Bashkëpunimi i shërbimeve tona policore me Interpolin është një dëshmi e angazhimit të përbashkët për luftën kundër krimit të organizuar dhe krimeve të rënda.

Policia e Shkodrës po vazhdon hetimet për të zbardhur të gjithë rrethanat e ngjarjes dhe për të vënë përpara drejtësisë dhe autorë të tjerë të mundshëm të implikuar”, njofton policia.

LEXONI GJITHASHTU:

• Shënjestra ishte pronari i kompanisë, si u ekzekutua ekonomisti i firmës në Kurbin
• Ekonomisti u vra brenda zyrës, si ndodhi atentatit në Kurbin. Pistat e hetimit