Zelenski kërkon parapërgatitje për sulm bërthamor nga Rusia

Presidenti i Ukrainës, Volodimir Zelenski ka paralajmëruar se Rusia është e gatshme të përdorë armë bërthamore për t’i dhënë fund pushtimit të Ukrainës në mënyrë katastrofike.

Ai bëri thirrje që bota të përgatitet për më të keqen dhe të marrë masa për të siguruar rezerva të ilaçeve kundër rrezatimit si dhe të ndërtojë strehime për sulme ajrore.

Paralajmërimin e fortë, Zelenski e ka bërë gjatë një interviste të shtunën në mbrëmje për mediat lokale në Ukrainë, shkruan “Daily Mail”.

“Ne nuk duhet të presim momentin kur Rusia të vendosë të përdorë armët bërthamore, duhet të përgatitemi për këtë gjë. Rusia mund të përdorë çdo armë, jam i bindur për këtë”, tha ai.

Intervista e tij u transmetua në gjashtë faqe informative ukrainase.

Të premten, Zelenski tha se Putin për shkak të dëshpërimit mund të përdorë armë bërthamore taktike kundër rezistencës së Ukrainës.

Moska në shenjë hakmarrjeje për fundosjen e luftanijes ‘Moskva’ ka kryer bombardime në tetë qytete, përfshirë Kievin.

Këto komente të presidentit ukrainas, vijnë pas deklaratës së bërë nga zëdhënësi i Kremlinit, Dimitri Peskov për CNN, ku tha se Moska mund të përdorë armë nukleare në Ukrainën në rast të ‘një kërcënimi ekzistencial’.

Anija ‘Moskva’, konsiderohet si një humbja më e madhe e marinës ruse që prej 1945.

Ukraina thotë se e kanë goditur luftanijen me dy raketa ‘Neptune’ të lëshuara nga porti i Odesës.