Zgjedhjet e parakohshme lokale/ Pas Tiranës socialistët shpallin kandidatin e Matit

Pas kandidates për Bashkinë e Tiranës, Partia Socialiste ka bërë publik emrin e kandidatit për Bashkinë e Matit. Altin Bojni është emri të cilit Partia Socialiste i ka besuar kandidaturën për zgjedhjet e 9 nëntorit.

Bojni është i vetmi propozim që vjen nga strukturat e PS në Mat. Aktualisht ai mban postin e Drejtorit të Shëndetit Publik dhe kryetar i Këshillit Bashkiak, Financier me profesion, më herët ai ka mbajtur postin e drejtorit të postës dhe drejtorit të burgut të Burrelit.

Burime për Euronews Albania bëjnë me dije se javën e ardhshme pritet të mblidhet Kryesia e PS, e cila do të miratojë zyrtarisht këtë kandidaturë, së bashku me kandidaturat për pesë bashkitë e tjera.

Nga ana tjetër drejtuesi Politik i Qarkut Dibër, Blendi Klosi ditën e sotme ka zhvilluar një takim me strukturat e Partisë Socialiste. Përmes një postimi në rrjetet sociale, Klosi theksoi se kanë kryer analizën e rezultatit të marrë në zgjedhjet e 11 Majit.

Zgjedhjet në Bashkinë e Matit do të mbahen pak muaj pas dorëheqjes së kryebashkiakut, Agron Malaj. Malaj në zgjedhjet e 11 majit ishte në listën e hapur në Dibër. Largimi i tij si dhe dorëheqja e kryebashkiakëve të tjerë ka sjellë shpalljen e zgjedhjeve të parakohshme në 6 bashki të cilat u dekretuan nga presidenti Bajram Begaj.

Zgjedhjet e parakohshme do te mbahet edhe në Tiranë pas shkarkimit të Erion Veliajt ndërsa ai ka ankimuar vendimin në Gjykatën Kushtetuese. Kandidatura tjetër e shpallur nga PS është ajo e Tiranës, Ogerta Manastirliu.

LEXONI GJITHASHTU:

• Rama flet për herë të parë për dekretin e Begajt për Veliajn: E bëri me vullnetin
• Detaje nga takimi i Ramës me PS Tiranë, ndahen zonat e deputetëve! Rama bën rikthime