Zhgënjehen pensionistët e Shkodrës, shpërblimi i fundvitit nuk i kënaq aspak

Prej ditësh qeveria ka akorduar shpërblimin e fundvitit për pensionistët në vlerën e 5 mijë lekëve.

Por a janë të kënaqur ata duke marrë parasysh rritjen e çmimeve?

Euronews Albania bëri një vëzhgim në Shkodër dhe komunikoi me disa pensionistë.

Shpërblimin e cilësojnë si të pamjaftueshëm në raport me rritjen e çmimeve.

“Për ne pensionistët që kemi punuar 43 vjet, pak, pak. A mjaftojnë krahasuar me rritjen e çmimeve? Pu, pu, pu! E kam marrë bishtajën 3500 lekë, sa e preka me dorë ika …”, thotë një e moshuar.

“Për fukaranë dhe pensionistët edhe 10 lekë janë shumë. Keq boll, keq boll. Duhet të vënë dorën në zemër ata që marrin nga 5-6 milionë”, shprehet një tjetër.

Gjatë këtyre ditëve të ftohta dimri në sportelet e postës ka pasur radhë për tërheqjen e pensionit në Shkodër duke u shoqëruar herë pas here dhe me mungesë parash për shkak të vonesës së shpërndarjes nga bankat të sasisë së parave për pensionistët.

Fundviti shoqërohet edhe nga rritja e çmimeve, që më së shumti rëndon në xhepat e pensionistëve.

LEXONI GJITHASHTU:

• “S’na ka zënë gjumi, s’di ku t’i çoj”- Pensionistët ironi me shpërblimin e fundvitit
• 5 mijë lekë shpërblim, pensionistët në Korçë dhe Pogradec të pakënaqur: Nuk na del