Energjia/ Koha e kursimit mbaroi, në verë popullata harxhoi më shumë

Bizneset dha familjarët nuk kanë kursyer energji elektrike në verë. Ata kanë harxhuar më shumë kilovatë për shkak të temperaturave të larta dhe çmimeve të ulura të bursave në treg.

Në periudhën korrik-shtator, Shqipëria prodhoi 1.6 teravat energji elektrike.

Sasia është rreth 18 % më e lartë se në verën e vitit 2022, çka i ka sjellë vendit frymëmarrje në menaxhimin e situatës me tregtinë dhe furnizimin në popullatë.

Kjo e fundit, del se ka harxhuar më shumë energji se vitin e kaluar. Si bizneset, ashtu edhe familjarët, kanë konsumuar 1.58 teravat, ndryshe nga vjet kur u konsumuan 1.51.

Tejkalimi i krizës së vitit të kaluar dhe heqja e masave për kursim të energjisë, ndikuan në shtimin e konsumit energjetik këtë periudhë. Po ashtu, prania e shtuar dhe vala e të nxehtit në fund të korrikut dhe fillim të gushtit, reflektuan tek konsumi.

Sipas strukturës së prodhimit, Hidrocentralet publike në Drin, mbartin 58% të sasisë. Pjesa tjetër, 41.5% prodhohet nga HEC-et private koncesionare dhe 0.5% nga panelet diellore.

Bilanci për 3-mujorin e parë, është publikuar nga Instituti i Statistikave, i cili zbulon se edhe niveli i humbjeve dhe vjedhjeve të energjisë elektrike është reduktuar këtë vit, çka tregon për nisje të një viti të mbarë në sektor.

LEXONI GJITHASHTU:

• Luhaten çmimet e importit, nafta dhe energjia në rënie
• Rritet prodhimi i energjisë elektrike, 30 për qind më shumë se vitin e kaluar