200 lekë kastraveci në Tiranë, fermeri: E japim 40 lekë/kg te grumbulluesi

Të dhënat zyrtare të Ministrisë së Bujqësisë tregojnë se në vendin tonë, ka në total një numër prej 260 pikash grumbullimi. Nga këto, shumica dërrmuese, rreth 181 prej tyre, janë pika grumbullimi që funksionojnë për mbledhjen e frutave dhe perimeve. 60 pika janë për grumbullim të bimëve mjekësore dhe aromatike si dhe 12 të tjera për blegtorinë, ndërsa janë dhe 5 pika me objekt të papërcaktuar qartë.

Fermerët dorëzojnë prodhimin e tyre te pika e grumbullimit. Zakonisht, grumbulluesit kur marrin prodhimin te fermerët, nuk paracaktojnë çmimin e blerjes së produktit. Pasi marrin prodhimin, grumbulluesit e magazinojnë duke bërë ambalazhimin për eksport jashtë vendit apo dhe shitje për tregjet brenda vendit. Pasi, gjejnë treg, grumbulluesit njoftojnë fermerët për çmimin me të cilin do të blejnë prodhimin që e kanë grumbulluar disa ditë më herët.

Gurim Oshafi, fermer nga Berati tha në emisionin GoodMorning Albanians në Euronews Albania se produktet që prodhojnë po i japin shumë lirë te grumbulluesit, ndërkohë që te konsumatori ky produkt shkon me çmim disa fish më shumë. Ai bëri thirrje që shteti të ndërhyjë për të bërë një balancim të fitimit të vërtetë mes fermerit, tregtarit dhe konsumatorit.

“Kastravecin, që është një produkt konsumi, po e shesim 400-500 lekë, ndërkohë që në tregun e Tiranës shkon në 2 mijë lekë. Jemi 3 hallka të një zinxhirit; fermerë, tregtarë, konsumatorë, këtu dëmtohen 2 hallka, fermer dhe konsumator dhe fitimi është i madh te tregtarët. Këtu duhet të ndërhyjë shteti për të bërë balancimin e këtij fitimi, se vërtetë konsumatori po e blen 2 mijë lekë, por fermeri 400 lekë të vjetra po e shet”, tha ai.

LEXONI GJITHASHTU:

• Fermerët “detyrohen” të ulin çmimet, rritet kërkesa për blerje, ja çfarë ndikoi
• Francë, fermerët reagojnë me zemërim ndaj Presidentit Macron