3 destinacione interesante që duhen vizituar në rrethinat e Shkodrës

Përveç qytetit, Shkodra ka destinacione interesante edhe në rrethinat e saj, të cilat mund të qasen lehtësisht me makina apo dhe biçikleta.

Emisioni “Udhëtarët” në Euronews Albania solli të martën në vëmendje të paktën tre pika tejet të veçanta për t’u vizituar jo shumë larg qytetit veriperëndimor të Shqipërisë.

Shpella e Gajtanit

Shpella e Gajtanit, një monument natyre, vendbanim i hershëm i kohës së paleolitit, ndodhet rreth 12 kilometra në lindje të qytetit të Shkodrës. Atje mund të shkohet lehtësisht për më pak se 20 minuta me makinë përgjatë rrugës rurale Shkodër-Gur i Zi-Gajtan.

• “Udhëtarët” eksplorojnë shpellën e Gajtanit, vendbanim i hershëm i paleolitit

Me një hyrje të ngushtë, por me hapësira të mëdha përbrënda, shpella është e veçantë për faktin se mendohet të ketë qenë e banuar në epokën e gurit.

Disa fise kanë jetuar aty teksa dominonte matriarkati ku gruaja kishte rolin dominant të prijëses së grupit. Prijësa mendohet se kishte një vend të veçantë tip poltrone guri ku ulej. Pamjet e brendshme të shpellës u ekspozuan në emisionin “Udhëtarët”.

Qyteti i lashtë i Gajtanit

Jo shumë larg shpellës ndodhen rrënojat e një prej qyteteve më të lashta ilire, qytetit të Gajtanit themeluar pikërisht nga fiset që në lashtësi jetonin në shpellën e Gajtanit. Rrugëtimi për në rrënojat arkeologjike nuk është i vështirë teksa nëpër tokë mund të gjehen lehtësisht mbetje enësh balte.

Një rrugëtim që mund të të sjellë pas në kohë pasi është i njëjti që në lashtësi bënin fiset ilire për të lëvizur nga shpella në qytet. Shpella mendohet se në periudhën e hekurit u kthye në strehë për rastet kur qyteti mund të sulmohej.

• Qyteza e Gajtanit, vendbanimi ilir që të kthen pas në kohë

Qyteti ndërkohë qe fortifikuar dhe fakti për këtë janë rrënojat e mureve të tij rreth 3.5 metra të gjera. Arkeologët mendojnë se qyteti i Gajtanit ka qenë i zhvilluar kryesisht në prodhimin e enëve të baltës, të cilat eksportoheshin deri në Koman atje ku janë gjetur gjithashtu vendbanime të tjera ilire.

Vizita e rrënojave të qytetit të Gajtanit është një miks mes një udhëtimi për arkeologji dhe ecjeje për të soditur natyrën.

 Fshati Zogaj

Fshati Zogaj, rreth 13 kilometra në perëndim të Shkodrës (në vazhdim të rrugës së Shirokës), është një fshat buzë liqenit që njihet për peshkimin, zejtarinë me tezgjah dhe natyrën e bukur.

Në kufi me Malin e Zi, Zogaj ofron për turistët mikëpritjen, mundësinë për të soditur liqenin, mjedisin përreth dhe traditat e ruajtura me kujdes siç janë punimet e qilimave me tezgjah.

• Zogaj, fshati turistik buzë Liqenit të Shkodrës që mban ende gjallë punimin në tezgjah

Fshati ka rrugica të ngushta të shtruara me kalldrëm. Njësoj si në qytet, edhe këtu oborret e shtëpive janë me lulebore, trëndafila apo livandë, ndërsa buzë liqenit mund të gjeni dhe lokale fantastike nga ku mund të shijohet peizazhi i liqenit.

Për të pasionuarit pas peshkimit apo kundrimit të shpendëve, Zogaj ka mundësi pafund. Ndërkohë që për vizitorët e thjeshtë një xhiro me varkë nuk duhet humbur.

Nëse ju pëlqejnë udhëtimet dhe eksplorimi i zonave të reja mos e humbni emisionin “Udhëtarët” me Loneta Prognin dhe Renaldo Salianjin çdo ditë nga ora 17:00.

LEXONI GJITHASHTU:

“Udhëtarët” nisin rrugëtimin e parë nga “djepi i kulturës”, Shkodra