974 të infektuar në RMV, Këshilli i Sigurisë Kombëtare pritet të zgjasë gjendjen e jashtëzakonshme

Në Maqedoninë e Veriut ka arritur në 974 numri i të infektuarve me COVID-19. Gjatë 24 orëve janë realizuar 500 teste, ku 66 persona kanë rezultuar bartës të COVID-19. Numri i përgjithshëm i të testuarve ka arritur në 9,762, ndërsa deri tani kanë humbur betejën e sëmundjes 45 qytetarë.

Drejtuesit e qeverisë dhe të pushtetit lokal në Kumanovë, qytetin me më shumë të infektuar 236 kanë shkëmbyer mendime të kundërta nëse duhet ose jo që ky qytet të vendoset në karantinë shtetërore.

Këshilli i Sigurisë Kombëtare që drejtohet nga Presidenti maqedonas, Stevo Pendarovski të enjten me kërkesë të qeverisë pritet të zgjasë edhe për një muaj gjendjen e jashtëzakonshme në këtë vend.

Pandemia globale COVID-19 ka shkatuar pasoja të rëndë sociale, ndërsa agresiviteti i virusit ka detyruar autoritetet në shumë vende të botës, që të ndërmarrin masa shtesë, duke bllokuar aktivitetin normal të ekonomisë. Këto masa kanë sjellë shkurtime dhe pezullime të vendeve të punës në mbarë globin.