Maqedonia e Veriut regjistron për herë të parë trend pozitiv për COVID-19

Ndërkohë që vendi ndodhet në karantinim të plotë, për herë të parë që nga përhapja e COVID-19, Maqedonia e Veriut ka njohur një bilanc pozitiv. Kjo pasi në 24 orët e fundit janë shënuar 18 raste të reja të të prekurve, ndërsa nga ana tjetër janë 21 pacientë të shëruar.

Benjamin Arifi, korrespondent i “Euronews Albania”, raporton se, nëse një trend i tillë pozitiv do të konfirmohet dhe në ditët në vazhdim, atëherë kjo do të thotë se Maqedonia e Veriut e ka kaluar tashmë pikun e pandemisë.

Ministria e Shëndetësisë në Maqedoninë e Veriut njoftoi se sot Instituti i Shëndetit Publik regjistroi 21 pacientë të shëruar – 16 nga Shkupi, tre nga Kumanova dhe dy nga Shtipi. Numri i pacientëve të shëruar në vend është 200.

Ndërkohë në orët e fundit  kanë humbur jetën tre pacientë në moshës 46, 63 dhe 71 vjeç. Po ashtu, numri i përgjithshëm i pacientëve të diagnostikuar me Covid-19 në Maqedoninë e Veriut është 1225.