Hapen dyqanet e Çarshisë në Shkup, pronarët: Dy muajt mbyllur na falimentuan

Ka 20 vite që shet veshje, dhe 20 vite që jeton me të ardhurat modeste nga biznesi i tij, por për vetëm dy muajt e pandemisë, aq sa ka zgjatur mbyllja e detyrueshme e dyqanit, thuajse ka falimentuar. Ky është Rexhep Avdiu, pronar i një prej dyqaneve në Çarshinë e Shkupit, që ka traditë në shitjen e veshjeve klasike.

 “Ne jemi biznes i vogël dhe normalisht që te ne edhe një ditë mungesë për neve është edhe mungesë e punës. Çdo ditë presim mos do të bëhet më mirë. Koha për sa kemi qenë të mbyllur është e gjatë. Përafërsisht dy muaj. Dy muaj të mos veprosh, është normale që edhe humbjet ti kesh të mëdha. Nuk kemi hasë në asnjë mirëkuptim lidhur me pagesat për qira, rrymë.”, Rexhep Avdiu, pronar dyqani për tekstil

Tani, vetëm dy ditë pas rihapjes së dyqanit, është detyruar që të shesë prodhimet e tij me çmim më të ulët se sa vlera reale, vetëm për të mbuluar shpenzimet elementare.

“Është hera e parë që bëj kësi lloj zbritjeje. Për 90 për qind. Ju them sinqerisht se produktet i shes me çmimin me të cilin i kam blerë. Gjithë këtë po e bëj vetëm që biznesi mos të falimentojë.  Nëse më parashtroni pyetje se a kemi ndonjë plan se si do veprojmë, nuk është se kemi diçka në plan, por të gjitha shpresat i kemi tek Zoti dhe shteti”, Rexhep Avdiu, pronar dyqani për tekstil.

Rexhepi nuk ka besim tek masat e paralajmëruara të Qeverisë për ndihmë ndaj bizneseve të vogla për të cilat thekson se janë në formë kredie që duhet të kthehen. Kjo, sipas tij, e fut biznesin në borxhe edhe më të mëdha duke rrezikuar falimentimin.