‘Kemi shumë halle’, i riu me aftësi ndryshe tregon se nuk mjafton bonusi

3 mijë lekë të reja është bonusi që përfitojnë tetra dhe paraplegjikët nga Paketa e Rezistencës Sociale, për t’i rezistuar krizës ekonomike me rritjen e çmimeve në vendin tonë.

Ne kemi pyetur njërin prej tyre, paraplegjikun Erblin Karaj, nëse kjo shumë është e mjaftueshme dhe nëse mund të përballojë rritjen e çmimeve.

“Më këtë vendimin e fundit të qeverisë z. Rama, mua më duket jo e lartë si pagesë. Të vret shumë pjesa e ushqimeve dhe janë rritur shumë”, u shpreh ai.

Erblini ka lindur me këtë problem shëndetësor dhe kjo e ka penguar atë që të punojë.

“Jam në kërkim të një vendi pune”, shprehet ai.

Jetesa vetëm me ndihmë sociale po i bëhet çdo ditë e më e vështirë për shkak të rritjes së çmimeve.

“Nuk di sesi ta përshkruaj këtë. Ne invalidët kemi shumë halle të tjera, por nuk është një ndihmë kaq e madhe. Mishin nuk e prek dot se ka shkuar në stratosferë”, tha ai.

Edhe pse me aftësi të kufizuara, ai ka qenë çdo ditë i pranishëm në protestat e organizuar kundër rritjes së çmimeve.

Ai është i vendosur që do të dalë sërish në protestë, deri kur zëri I të gjithëve të dëgjohet.