Bardh Spahia merr zyrtarisht drejtimin e Bashkisë Shkodër

Bardh Spahia ka marrë zyrtarisht detyrën e kryetarit të Bashkisë Shkodër, pas fitores në zgjedhjet e pjesshme të 6 marsit si kandidat i Komisionit të Rithemelimit.

Ai zëvendëson në këtë detyrë Voltana Ademin që ushtroi funksionin e drejtueses së bashkisë më të madhe të Veriut për afro 7 vjet.

Në fjalën e mbajtur në ceremoninë e organizuar me këtë rast Spahia falenderoi paraardhësen e tij për kontributin në shërbim të shkodranëve.

Ai premtoi se do të shfrytëzojë në maksimum mandatin e tij të shkurtër për të rikthyer vëmendjen nga Shkodra.

“Nga dita e sotme, unë si kryetar i bashkisë dhe ju si këshilltarë bashkiakë, nisim së bashku një rrugëtim me synimin t’i shërbejmë sa më mirë Shkodrës e shkodranëve. Përpara se të jemi në këto detyra, para se të jemi përfaqësues të një subjekti të caktuar politik që na ka propozuar a mbështetur, jemi shkodranë. Nëse bashkojmë përpjekjet tona, zërat tonë për Shkodrën, jam i sigurtë se jo vetëm do të dëgjohemi më shumë e më larg, por edhe bashkia jonë do të ketë më shumë vëmendje, investime e zhvillim”, tha Spahia.

LEXONI GJITHASHTU:

• Bardh Spahia fiton zgjedhjet në Shkodër
• Berisha largohet nga seanca parlamentare, dënon sjelljen e Ramës