Të bashkohen parcelat e tokave që të ketë fitim në bujqësi, thotë eksperti

Eksperti i bujqësisë, Shkëlzen Marku tha se parcelat e tokës duhet të bashkohen, në mënyrë që fermerët të mbjellin në sasi më të mëdha.

Për emisionin “Mirëmëngjes” në “Euronews Albania”, Marku u shpreh se është e vështirë që fermerët të kenë fitim, më këtë strukturë toke që ka vendi sot.

“Duhet të nxisim mbjelljen në sipërfaqe të mëdha, pra të kemi bashkim të parcelave. E kemi të vështirë të dalim me fitim me këtë strukturë toke që kemi”, tha Marku.

Sipas tij, në 70% të tokave bujqësore nuk ka konflikt pronësie, ndaj qeveria duhet të angazhojë strukturat për të pajisuar pronarët e tokave me dokumentet përkatëse, pasi kjo mbetet ende një problem.

“Nëse unë nuk kam dokumentet e pronësisë, nuk mund t’ia shes atij që do ta punojë tokën. Në 70% të tokave bujqësore nuk ka konflikt pronësie, ndaj qeveria duhet të angazhojë strukturat për të dhënë dokumentet e pronësisë për të nxitur tregun”, deklaroi ai.

Marku nënvizoi se me këto mekanizma, fermeri mund të ketë më shumë interes për të mbjellë vjeshtën e ardhshme.

LEXONI GJITHASHTU

• Kosova ndalon eksportin e ushqimeve bazë, eksperti: Shqipëria nuk ndikohet