Lufta në uzinën Azovstal, trupat ruse avancojnë në lindje

Forcat mbrojtëse në uzinën e çelikut Azovstal kanë publikuar një video ku dëshmohet se luftimet vijojnë  në bastionin e fundit të Ukrainës në qytetin e Mariupol.

Me evakuimin e civilëve, fati i atyre që mbrojnë uzinën mbetet i panjohur. Besohet se në fabrikë janë disa qindra ushtarë ukrainas të plagosur dhe pa furnizime mjekësore.

Autoritetet ukrainase shprehen se ata po vazhdojnë përpjekjet diplomatike për të shpëtuar luftëtarët.

Familjarët kërkojnë zgjidhje urgjente që të afërmit e tyre të shpëtohen të gjallë.

“Ajo që po ndodh nuk është luftë, është një masakër, ka dhunime të çdo konvente. Kanë vrarë  njerëzit që ishin dorëzuar, nuk është luftë kjo çfarë po ndodh” shprehet babai i një prej luftëtarëve”.

Në Lindje të vendit  në shumë qytete po shihet avancimi i trupave ruse.

Qyteti i Bakhmut po bombardohet  dhe shumë prej zonave përreth janë pushtuar tashmë.

Qytetarët  po përpiqen të vazhdojnë jetën e tyre por ata e dinë se liria është e rrezikuar.

Situata mbetet e zymtë për fëmijët.

Pavarësisht bombardimeve të vazhdueshme ruse, ukrainasit organizojnë mësime për fëmijët ndërsa shkollat mbeten të mbyllura ose janë shkatërruar.

Por me vështirësitë psikologjike nga lufta dhe aksesin e kufizuar në internet, është një sfidë për nxënësit që të vijojnë marrjen e dijeve.

LEXONI GJITHASHTU:

• Ukrainasi i bllokuar në Azovstal kërkon ndihmë nga Elon Musk: Nëse jo ti, kush?