Ukraina thotë se rusët po shtojnë sulmet në lindje, por po tërhiqen në veri

Zyrtarët ukrainas kanë raportuar sulme me raketa dhe granatime në disa rajone, ndërsa forcat ruse fokusojnë përpjekjet e tyre në vijat e frontit në Luhansk. Por ata pretendojnë suksese të mëtejshme në rajonin e Kharkivit.

Një sulm i rrallë raketor është raportuar në rajonin perëndimor të Lvivit gjithashtu.

Serhiy Hayday, kreu i administratës ushtarake rajonale të Luhansk, tha herët të dielën se “rusët po mbledhin pajisje dhe fuqi punëtore më pranë Severodonetsk dhe po përgatiten për ta sulmuar atë”.

Severodonetsk është një nga disa qytete industriale në lindje që është bombarduar në mënyrë të pamëshirshme për javë të tëra, ndërsa forcat ruse përpiqen të thyejnë mbrojtjen ukrainase.

Hayday shtoi se fabrika kimike e qytetit dhe ndërtesat e larta ishin goditur.

“Ka shumë shkatërrime. 11 ndërtesa shumëkatëshe në lagjet e reja dhe të vjetra të qytetit (u goditën), në disa prej tyre banesat morën flakë,” – u shpreh ai.

Disa vendbanime në jug dhe në perëndim të Severodonetsk u goditën gjithashtu, duke përfshirë Vrubivka dhe Komyshuvakha.

Forcat ruse pritet të përparojnë më në perëndim nëse mund të sigurojnë Severodonetsk, ku ende jetojnë 15 mijë njerëz. Shumica e banorëve janë evakuuar.

Ukraina ka dhënë pak detaje rreth kundërofensivës së saj në rajonin e Kharkiv, ku trupat kanë bërë përparime të rëndësishme në veri dhe lindje drejt kufirit rus. Qëllimi i ofensivës ukrainase është të shkurtojë linjat ruse të furnizimit për forcat e saj që përpiqen të avancojnë në rajonin e Donetsk.

LEXONI GJITHASHTU:

• Ish-presidentët ukrainas thirrje ndërkombëtareve për luftëtarët e Azovstal