‘Fotomontazh’, Rama: Hakerat iranianë nuk kanë publikuar të dhënat e MEMEX-it

Kryeministri, Edi Rama deklaroi se dokumenti i publikuar nga hakerat iranianë këtë të hënë, nuk ka lidhje me sistemin MEMEX të Ministrisë së Brendshme.

Në fjalën e tij gjatë seancës plenare në Kuvend, Rama u shpreh se kemi të bëjmë me një fotomontazh.

“Menjëherë ngriheni në këmbë, cilat janë lidhjet e krimit me atë, duke parë fotomontazhe. Ajo që ka dalë, nuk është sistemi MEMEX i Ministrisë së Brendshme, kaq e thjeshtë është.

Duhet të kalojë e gjithë dita, duke torolis gjithë opinionin publik që ndjek këto lloje burimesh, duke dëgjuar gënjeshtra dhe konspiracione  nga më absurdet. Faktikisht, është një e pavërtetë nga fillimi deri në fund”, theksoi kreu i qeverisë.

1.7 giga byte material sensitiv u publikua nga hakerat e ashtëquajtur “Homeland Justice” mëngjesin e së hënës në platformën e komunikimit Telegram.

Bëhet fjalë për 49 lista të gjata ku pasqyrohet identiteti i personave, numri ID, mosha, vendlindja dhe foto e tyre e sistemit TIMS.

Në këto publikime, nuk jepen detaje të tjera se për çfarë janë të dyshuar personat në fjalë por besohet se materialet i përkasin sistemit MEMEX që administrohet nga Policia e Shtetit.

Sistemi kompleks mbledh e përpunon informacion kriminal dhe lidhjet e personave të skeduar ose dyshuar për ngjarje ose veprimtari kriminale.

MEMEX gjithashtu ndërvepron me sistemet e tjera që operon policia si ai TIMS i cili u sulmua më herët nga hakerat iranianë.

Në një reagim, Policia e Shtetit ka mohuar që të dhënat të jenë nga sistemi MEMEX duke insistuar që nuk janë prekur apo dëmtuar të dhëna sensitive që administrohen e kanë të bëjnë me punën policore.

LEXONI GJITHASHTU

• Hakerat goditën MEMEX? Spiropali: Postojnë emra pa lidhje, hidhen akuza absurde
• Hakerat marrin edhe MEMEX? Sulmi kibernetik prek serverin e të dhënave operative
• Sulmet kibernetike, Noka: Hakerat kanë marrë të dhëna nga sistemi TIMS dhe me Memex