Albin Kurti nuk ka arritur asnjë sukses në politikën e jashtme, thotë gazetari

Gazetari Lirim Mehmetaj thotë se kryeministri i Kosovës, Albin Kurti nuk ka arritur asnjë sukses në politikën e jashtme, gjatë dy viteve që qeveris vendin.

Në një intervistë për Euronews Albania, Mehmetaj u shpreh se me refuzimet e Kurtit për çështjen e targave, po provohet që Kosova është sovrane, por kjo ka një çmim, që sipas tij, janë kritikat e partnerëve ndërkombëtarë.

“Ne po provojmë të tregohemi sovran, mbase me të drejtë, këtë do ta tregojë koha, me çmimin që të kritikohemi nga Bashkimi Evropian dhe partnerët ndërkombëtare. Cila do të jetë fitorja e Kosovës, përtej Albin Kurtit, sepse derisa raportet me Serbinë janë kartë elektorale, ne gjithmonë do ta kemi të vështirë ta prejmë se ku është fushata elektrale politike dhe ku është interesi i shtetit.

Deri më tani, këto dy vite të qeverisë së Kosovës, kjo administratë e Kosovës nuk ka pasur asnjë sukses në politikën e jashtme. Asnjë njohje, asnjë anëtarësim, asnjë përmirësim të raporteve me asnjë shtet”, theksoi ai.

Kryeministri i Kosovës, Albin Kurti ka shtyrë për 48 orë zbatimin e fazës së dytë të vendimit për riregjistrimin e makinave me targa ilegale serbe në RKS.

Kërkesën për shtyrje 48-orëshe e kanë bërë Shtetet e Bashkuara të Amerikës, përmes ambasadorit amerikan në Kosovë, Jeff Hovenier.

Kjo, për t’i lejuar zyrtarët evropianë dhe ata amerikanë që të angazhohen me Kosovën dhe Serbinë për të gjetur zgjidhje për këtë çështje.

Si përgjigje ndaj kërkesës së ambasadorit amerikan, Kurti ka thënë se është i gatshëm të punojë me SHBA-në dhe BE-në për të gjetur zgjidhje në dy ditët e ardhshme.

LEXONI GJITHASHTU

• Digjet një automjet me targa serbe në veri të Mitrovicës
• Vuçiç me serbët e Kosovës: Koha për të treguar seriozitet dhe përgjegjësi si komb
• Kosova shtyn për 48 orë masën e vendosjes së gjobave për targat