Partitë fantazmë, Celibashi: Shumë subjekte ekzistojnë vetëm në gjykatë

Në Shqipëri janë të regjistruara 131 parti politike në Gjykatën e Tiranës, por vetëm gjysma e tyre kanë adresa të deklaruara.

Duke përjashtuar 3 partitë kryesore dhe disa më të vogla që herë pas herë marrin nga 1 deri në 3 deputetë, gjithë të tjerat janë thuajse inekzistente dhe shumica as nuk regjistrohen në zgjedhje.

Pohimi erdhi këtë të mërkurë edhe nga kryekomisioneri Ilirjan Celibashi, i cili theksoi se do duhet parë një zgjidhje për këtë gjendje të krijuar me numrin e partive që rezultojnë si subjekte politike.

“Një pjesë e madhe e partive politike, edhe pse janë regjistruar në Gjykatën e Tiranës janë inekzistente, jo vetëm në veprimtari politike, por nuk duken asgjëkund. Por ato thjesht ekzistojnë vetëm si subjekte që kanë zënë kolonat në regjistrin e partive politike dhe asgjë më tepër”, u shpreh Celibashi.

Kreu i KQZ foli edhe për zgjedhjet e ardhshme lokale të 14 majit, ku theksoi se mundësia e zgjerimit të votimit dhe numërimit elektronik do të varet nga fondet që do të akordojë qeveria.

“Do donim të dinim nëse është i mundur financimi i zhvillimit të votimit elektronik në këto 6 bashki, maksimumi i muajit dhjetor, përndryshe edhe nëse këto para i jepen KQZ, procesi i realizimit kërkon kohë. Ka deklarime sporadike të përfaqësuesve të partive për ta zgjeruar votimin elektronik, por nuk ka një shtysë të fortë”, u shpreh komisioneri shtetëror i zgjedhjeve.

Celibashi foli edhe për financimin e partive politike, ku theksoi se për akuzat e parave nga vende të huaja, hetimi është në dorën e Prokurorisë.

“Ka parashikime në Kodin Penal dhe në Kodin Zgjedhor në lidhje me këtë çështje dhe janë çështje që mesa di unë janë duke u adresuar nga prokuroria. Përbëjnë shkelje të rënda ligji, që klasifikohen si vepra penale dhe si të tilla trajtohen nga organet përkatëse të drejtësisë”, theksoi Celibashi.

LEXONI GJITHASHTU:

• Akuzat për financimet ruse në PD, Celibashi: Po merret Prokuroria
• Cilën PD do regjistrojë në zgjedhje? Celibashi: Do vendosim kur të na vijë kërkesa