Haradinaj-Stublla: BE qasje asimetrike ndaj Kosovës dhe Serbisë për dialogun

Qeveria e Kosovës duhet ta vlerësojë me shumë kujdes këshillën amerikane për të mos i zhvilluar zgjedhjet në komunat veriore.

Kështu u shpreh ish-ministrja e Jashtme Meliza Haradinaj Stublla në emisionin Balkan Talks, në Euronews Albania ndërsa kritikon ashpër qëndrimin e deritanishëm të Bashkimit Europian, që sipas saj ka ushtruar shumë presion ndaj Kosovës dhe aspak ndaj Serbisë.

“Bashkësia ndërkombëtare, më saktë Perëndimi janë më tolerantë ndaj shkeljeve të Serbisë në dialog, por më qortues dhe më të saktë dhe të shpejtë si duhet të kritikohet Kosova apo si i duhen bërë kërkesat. Ka një qasje asimetrike të BE ndaj Kosovës dhe Serbisë në dialog. E kemi parë jo vetëm në çështjen e targave, por tani e shohin edhe lidhur me zgjedhjet në veri që tani kërkohet që të shtyhen. Kjo nuk është situatë aspak e këndshme duke e ditur sa jo konstruktive është Serbia dhe se si punon në veri me strukturat e saj paralele që të minojë shtetin e Kosovës”, tha Haradinaj-Stublla.

Ish-shefja e diplomacisë së Kosovës deklaron se Prishtina duhet të sigurojë përkrahjen e Shteteve të Bashkuara dhe vendeve të Kuintit për të arritur tek marrëveshja finale me Serbinë, që duhet të jetë njohja reciproke.

LEXONI GJITHASHTU:

• “Teksti ndodhet në Prishtinë dhe Beograd”, Borrell jep detaje nga dialogu
• Hoti akuza Kurtit për dialogun me Serbinë: S’ka lidership, po qeveris pa vizion