Gazetari: KFOR-i gati të ndërhyjë në veri, mesazh i fortë për Serbinë

Misioni i NATO-s në Kosovë, KFOR, ka bërë të ditur se në ditët në vijim do të kryejë stërvitje të rregullta ushtarake afër bazës që ka në Novosellë.

Gazetari i Euronews Albania, Kosovë Gjoci raporton se ky është një mesazh për serbët lokalë, se mund të ndërhyhet duke përdorur edhe forcën.

Ndër të tjera, Gjoci u shpreh se situata në veri nuk ka ndryshuar dhe barrikadat vijojnë të mbeten.

“Besoj që me këtë, KFOR-i fillimisht do t’ua bëjë me dije serbëve që po t’i duhet të reagojë edhe në një formë, ndoshta të padëshirueshme, duke përdorur edhe forcën, mund ta bëjë këtë. Nuk e di nëse serbët do ta kuptojnë këtë ose jo, kjo mbetet të shihet në ditët në vazhdim.

Besoj se kjo stërvitje nuk është e rastësishme, nuk vjen thjesht nga hiçi, por ka për bazë atë që po ndodh në pjesën veriore, bllokimin e rugëve në disa vende të caktuara, diku janë 5-6 barrikada në rrugë kryesore që të çojnë në pikat kufitare”, raportoi Gjoci.

Ditën e djeshme, në anën serbe afër Jarinjës – pikëkalimit kufitar mes Kosovës dhe Serbisë u mbajt një protestë e thirrur nga grupe djathtiste serbe, si shenjë mbështetjeje ndaj barrikadave që kanë ngritur serbët lokalë në veri të Kosovës.

Protestuesit janë shpërndarë pasi Policia serbe u ka thënë se do të lirojë një person që ka arrestuar në protestë.

LEXONI GJITHASHTU

• KFOR-i shton praninë në Jarinjë pas protestës së serbëve
• Sveçla për protestën në Jarinjë: Episod i luftës hibride serbo-ruse ndaj Kosovës
• Përfundon protesta e të djathtëve serbë në Jarinje