Escobar dhe Lajçak takojnë sot Kurtin në Prishtinë

Këtë të premte, pesë diplomatë nga BE-ja dhe SHBA-ja do të jenë në Prishtinë.

Në përpjekje për ta avancuar dialogun me Serbinë, emisari special i BE-së, Miroslav Lajcak do të takohet me kryeministrin Albin Kurti.

Lajçak, në këtë vizitë, do të shoqërohet nga këshilltari i presidentit francez, i angazhuar për dialogun Kosovë – Serbi; këshilltari i kancelarit gjerman, këshilltari i kryeministrit të Italisë dhe i dërguari i SHBA për Ballkanin Perëndimor, Gabriel Escobar.

Për herë të parë, në negociata do të perfshihet drejtperdrejt edhe Roma zyrtare. Këshilltarët e Scholz, Macron dhe Melonit të shoqëruar nga Miroslav Lajçak dhe Gabriel Escobar, do të zbarkojnë në Prishtinë dhe më pas Beograd në përpjekjen për jetësimin e të ashtuquajturit plan franko-gjerman.

Në kuadër të kësaj marrëveshjeje, pritet që të marrë zgjidhje çështja e Asociacionit të Komunave me shumicë Serbe, marrëveshje për të cilën ka një presion të madh drejt qeverisë së Kosovës që ta themelojë në pajtim me vendimin e vitit 2015 të Gjykatës Kushtetuese.

LEXONI GJITHASHTU

• Diplomatë nga BE-SHBA në Prishtinë e Beograd, në negociata përfshihet edhe Italia