Ekspozita ‘100 vjet Flamurtar’ çelet në Vlorë me rastin e përvjetorit të klubit

“100 vjet Flamurtar”, me këtë titull në hollin e teatrit ‘Petro Marko’ është çelur ekspozita me fotografi për 22 disiplinat e sporteve të klubit vlonjat.

Kjo ekspozitë me rastin e aktiviteteve për 100-vjetorin e krijimit të klubit shumësportësh ka mbledhur personalitete të njohura të sportit në Vlorë.

Për legjendat e sportit, Vasil Ruçi e Sokol Kushta, Flamurtari ka bërë historinë dhe këto materiale janë provat e qarta të lavdisë.

“Janë këto sporte, janë këta njerëz që kanë lënë përshtypje te gjithë populli i Vlorës. Unë do ta filloj nga fundi dhe fundi është që Flamurtari të kthehet në Ligë Superiore. Aty ku e meriton”, tha Sokol Kushta.

“Ta gëzojë këtë 100-vjetor Flamurtari, ta gëzojë historinë e tij por gëzimin duhet ta ndajmë me të gjithë qytetarët e Vlorës dhe çdo njeri që ka arritur të kontribuojë në këtë ekip të madh”, u shpreh Vasil Ruçi.

Një hap drejt krijimit të Muzeut Flamurtari, ky ekip meriton të ketë një muze të posaçëm për të gjithë tifozët dhe qytetin, ka thënë drejtori i klubit shumësportësh Klevis Kaso.

Ekspozita do të qëndrojë e hapur deri më 27 mars.

LEXONI GJITHASHTU:

• Vlora në festë për Flamurtarin, veteranët në parket për 100-vjetorin e klubit
• 100-vjetori i Flamurtarit, aktivitete sportive dhe kulturore përgjatë javës në Vlorë