Zgjedhjet lokale, Çollaku: Opozita ra, të kuptojmë shkaqet e të ringrihemi sërish

Deputeti demokrat Kreshnik Çollaku tha se zgjedhjet e 14 Majit ishin humbje e paralajmëruar  për shkak të përçarjes së Partisë Demokratike.

Në një intervistë për Euronews Albania, ai theksoi se humbja e zgjedhjeve është rënie e opozitës dhe sipas tij kjo duhet pranuar.

Më tej ai nënvizoi se nëse do të kuptojnë arsyet e kësaj rënie do të kenë mundësi që të ringrihen sërish.

“Komunikimi është rruga e vetme për të zgjidhur situata të tilla që janë të rënda për të gjitha palët. Ne të gjithë e dinim se përballë kujt po shkonim të bënim betejë politike. Ajo që ndodhi është një rënie e opozitës. PD që është pjesa kryesore e opozitës është e ndarë. Prej një viti e kemi paralajmëruar këtë gjë, jemi përpjekur që të evitojmë ndarjen e demokratëve dhe nuk ia kemi dalë dot. Në momentin që PD është e ndarë, opozita është e dobët. Mendoj se në mënyrë absolute, nëse do kemi minimumin e ndërgjegjes politike e njerëzore është të shohim në sy këtë realitet.

Aftësia për të kuptuar këtë rënie dhe shkaqet e kësaj rënie, do të jetë mundësi e madhe për ringritje. Që PD të jetë forcë qeverisëse në këtë vend  duhen dy elementë, e para të bashkohet vota e çdo demokrati, dhe e dyta të ruhet në mënyrë të padiskutueshme partneriteti me aleatët tanë”- tha ai.

LEXONI GJITHASHTU: 

• Zgjedhjet e 14 Majit, Balla: Janë pranuar nga palët, nuk ka asnjë vërejtje
• Mbahet protesta e BF përpara KQZ, kërkohet hetim ndërkombëtar për Kamzën