Shembja e digës ukrainase, banorët marrin arratinë

Shembja e digës në lumin Dnipro ka shkaktuar evakuime në masë pasi fshatra të tërë përreth strukturës u përmbytën menjëherë. Ujërat kanë rrezikuar gjithashtu të mbjellat dhe kafshët në ferma, si dhe kanë kërcënuar furnizimin me ujë të pijshëm dhe rrjetet e komunikimit.

Presidenti Zelensky e ka cilësuar situatën si një “bombë ekologjike të shkatërrimit në masë” dhe ka fajësuar Moskën.

“E gjithë bota do të mësojë për këtë krim lufte të Rusisë, një gjenocid ekologjik. Ky shkatërrim i qëllimshëm i digës nga pushtuesit rusë është një bombë ekologjike e shkatërrimit në masë. Për hir të sigurisë së tyre, vendet e tjera duhet të tregojnë se Rusia nuk do t’ia hedhë paq pas këtij akti terrori,” – tha presidenti ukrainas.

Diga në Kakhovka dhe centrali hidroelektrik në lumin e Dniepers është një zonë që Moska ka kontrolluar përreth një vit. Të dyja palët janë përplasur në përpjekjet për të shpëtuar banorët. Ndërsa pasojat janë të një shkalle masive, janë njerëzit e zakonshëm që i ndjejnë ato më shumë.

“Jam veshur me rroba të thjeshta dhe kjo falë fqinjëve tanë. Ata janë kafshë të çmendura. Nëna ime është 80 vjeç dhe më duhet të kujdesem edhe për atë. Më duhet të mbledh të gjitha rrobat dhe t’i mbledh në këta jorganë,” – u shpreh një qytetar.

Pasojat ambientale dhe sociale janë të dukshme, ndërkohë që poshtë rrjedhës, zyrtarët po monitorojnë ujin për sistemet e ftohjes në impiantin bërthamor të Zaporizhias. Shkatërrimi i digës po ndihet në shumë zona.

Ekspertët thonë se problemi më i madh që ka të bëjë me të ardhmen e rajonit do të jetë nevoja për një pastrim masiv për të dezinfektuar tokën e mbjellë dhe burimet ujore.

LEXONI GJITHASHTU:

• BE paralajmëron për rënie të solidaritetit për refugjatët ukrainas
• Piktura nga fëmijët ukrainas, përjetimet e treguara përmes ngjyrave