Testohen pajisjet biometrike në Kukës, 45 946 zgjedhës kanë të drejtën e votës

Komisioni Qendror i Zgjedhjeve testoi këtë të martë pajisjet biometrike që do të bëjnë të mundur identifikimin e qytetarëve në zgjedhjet e së dielës për bashkinë e Kukësit.

5 ditë përpara se qytetarët e Kukësit t’i drejtohen kutive të votimit për të zgjedhur kryetarin e ri të bashkisë, Komisioni Qendror i Zgjedhjeve ka testuar disa pajisje të identifikimit biometrik të cilat do të përdoren në këto zgjedhje të pjesshme.

74 pajisjet elektronike do të vendosen në 74 qendrat e votimit të bashkisë së Kukësit dhe do të bëjnë të mundur identifikimin e qytetarit përmes kartës së identitetit nëse është votues apo jo në këtë bashki.

Të drejtën për të votuar e kanë 45 946 zgjedhës të cilët do t’ju drejtohen qendrat të votimit nga 7 deri në orën 19.00 dhe më pas kutitë e votimit do të dërgohen në KZAZ-ën e vetme të qytetit, numër 11.

Për të marrë drejtimin e qytetit janë në garë 2 kandidatë, nga Partia Socialiste Albert Halilaj dhe nga koalicioni ‘Bashkë fitojmë’ Emri Vata.

Kukësi shkon në zgjedhje më 24 shtator për shkak se ish kryebashkiaku socialist, Safet Gjici u përfshi në një skandal seksual dhe këshilli i ministrave e shkarkoi nga detyra.

LEXONI GJITHASHTU: 

• Baton Haxhiu: Kurti mashtrues, më vjen keq për kryeministrin tim
• Azerbajxhani nis operacion “kundër-terrorizmit” në Nagorno-Karabak