Protestat në Serbi, demonstruesit përpiqen të sulmojnë Bashkinë e Beogradit

Policia në kryeqytetin e Serbisë, Beograd, ka përdorur gaz lotsjellës për të shpërndarë turmat që protestonin për mashtrimin e dyshuar në zgjedhjet e përgjithshme të javës së kaluar.

Sipas mediave të huaja, ata ndërhynë pasi disa nga turma jashtë Bashkisë së Beogradit thyen xhamat dhe u përpoqën të hynin me forcë.

Aktivistët e opozitës thonë se policia përdori forcë të tepruar të dielën.

Ata thonë se qeveria manipuloi zgjedhjet e fituara nga partia në pushtet. Presidenti Aleksandar Vuçiç thotë se akuzat janë “plehra dhe gënjeshtra”.

Bashkëdrejtuesi i Frontit të Gjelbër të Majtë, Radomir Lazovic, thotë se oficerët e rrahën atë dhe një numër njerëzish të tjerë me shkopinj.

Ka pasur protesta paqësore çdo mbrëmje që nga zgjedhjet kombëtare dhe lokale të javës së kaluar. Të dielën ishte hera e parë që ato u bënë të dhunshme.

Mbështetësit e koalicionit opozitar ‘Serbia kundër dhunës’ u përpoqën të hynin në bashkinë e qytetit.

Srdjan Milivojeviç dhe Vladimir Obradoviç, dy udhëheqës të opozitës, u përpoqën të hapnin derën e ndërtesës. Policia përdori sprej piper për të zmbrapsur protestuesit.

Drejtuesit e opozitës dyshojnë se agjentët e ‘provokatorëve’ janë përfshirë në thyerjen e xhamave, duke shkaktuar ndërhyrjen e policisë.

Sofija Mandiç, një avokate, u tha të mbledhurve se Vuçiç duhet “të dorëzojë pushtetin në mënyrë paqësore”. Qeveria po “uzurponte” pushtetin, shtoi ajo.

LEXONI GJITHASHTU:

• Studentët i bashkohen protestës në Beograd, kërkohen zgjedhje të parakohshme 
• Greva dhe protesta në Serbi, studentët i bashkohen revoltës për zgjedhjet