Drejt mbarimit vaksinat kundër kancerit të mitrës, Daja: Presim doza të tjera

Dozat e vaksinës kundër kancerit në qafën e mitrës janë drejt fundit. Koordinatorja e programit kombëtar të Vaksinimit në Institutin e Shëndetit Publik, Rovena Daja, shprehet se interesi ka qenë shumë i lartë, jo vetëm mes vajzave 13-vjeçare që e kanë  të detyruar këtë vaksinë ,por edhe për grupmoshën, 14- 20-vjeç që u përfshinë në fushatë me dëshirë.

 “Gjatë vitit 2023, 75.6% është mbulesa vaksinale e vajzave që janë vaksinuar dhe kemi bërë edhe fushatën shtesë për vaksinimin e vajzave 13-20 vjeç sepse të dhënat tregojnë që ne morëm 10.000 doza por në fakt kemi pasur shumë kërkesa”,-tha Rovena Daja koordinatore e programit kombëtar të vaksinimit, ISHP.

Por nuk janë vetëm vajzat. Kërkesa për vaksinën ndaj HPV-së  ka pasur edhe nga djemtë dhe ISHP po projekton zgjerimin e fashës.

Studimet kanë treguar se 1 në 3 meshkuj  mbi moshën 15 vjeç janë të infektuar me të paktën një variant të virusit “human papilloma” dhe 1 në 5 janë infektuar me një ose më shumë nga gjenet kanceroze të HPV-së.

Vaksina Gardasil është 4 valente e cila mund të aplikohet vetëm me një dozë dhe sipas OBSH ajo është e aftë të mbulojë të gjitha shtamet që shkaktojnë kancer të qafës së mitrës. Në Shqipëri, vaksina HPV  është bërë pjesë e kalendarit të detyruar të vaksinimit për vajzat në moshën 13 vjeç dhe ka nisur të aplikohet që prej vitit 2022.

LEXONI GJITHASHTU:

• “Vaksina e fruthit nuk jep autizëm”, mjekja thirrje prindërve: Vaksinoni fëmijët!
• Vaksina kundër kancerit të qafës së mitrës, nis fushata edhe për vajzat 14-20 vjeçe