Bardhi komenton Rezolutën e PS: Rama nuk dëshiron të ndërtojë një shtet europian

Kryetari i Grupit Parlamentar të Partisë Demokratike, Gazment Bardhi, është shprehur se kryeministri Edi Rama nuk dëshiron të ndërtojë një shtet europian.

Komentet Bardhi i bëri gjatë një deklarate për mediat, ku komentoi Rezolutën e propozuar gjatë mbledhjes së djeshme të Grupit Parlamentar të PS dhe kabinetit qeveritar.

Bardhi tha gjithashtu se Rama dhe politikanë të tjerë të korruptuar e shohin integrimin në BE si një rrezik për pushtetin e tyre.

Ai shtoi se opozitës gjatë 11 viteve të qeverisjes së Ramës i janë hequr shumë të drejta parlamentare dhe sipas tij, Shqipëria e ka jetike ndryshimin e qeverisjes në zgjedhjet e ardhshme.

“Integrimi Europian është vonuar 11 vite nga keqqeverisja e Edi Ramës dhe korrupsioni i qeverisjes së tij. Rama as nuk dëshiron dhe as nuk arrin dot të ndërtojë as shtet europian dhe as shtet demokratik që lufron korrupsionin dhe ndërton një qeverisje në dobi të qytetarëve. Shqipëria nuk ka më kohë për të humbur me Ramën. Integrimi Europian duhet të bëjë bashkë demokratë, socialistë të ndershëm.

Siç ka ndodhur në shumë vende që lider të korruptuar e kanë parë integrimin në BE si rrezik të pushtetit të tyre të pamerituar, që është ndërtuar duke rrënuar mirëqenien e qytetarëve të tyre. Mbështetja jonë pa kushte ndaj çdo reforme, nuk ka qenë as e imponuar, as e shtirur. Në 11 vite, Rama e ka shndërruar korrupsionin në kryeveprën e qeverisjes së tij.

Opozitës iu hoqën të drejtat dhe kontrolli parlamentar është në pikën më të ulët ndonjëherë. Me Ramën nuk mund të ketë integrim. Partitë nuk kanë më të drejtë që të garojnë në koalicion, me rregulla që kanë rënë dakord shumë kohë para zgjedhjeve. Shqipëria e ka jetike jo vetëm ndryshimin e qeverisjes në zgjedhjet e ardhshme, por edhe ndryshimin qeverisës”, tha Bardhi.

LEXONI GJITHASHTU:

• Kreshnik Spahiu: Ju them parashikimin tim dy vjeçar për Berishën, Bardhin e Bashën
• Gjykata rrëzon kërkesën e Bardhit për të çregjistruar Bashën si kryetar i PD