Bardhi komenton kalimin e vulës te Berisha: Detyra kryesore që PD ka sot

Nënkryetari i Partisë Demokratike Gazment Bardhi, ka komentuar në një intervistë për Euronews Albania, vendimin e Gjykatës së Apelit për t’i dhënë vulën e Partisë Demokratike, ish-kryeministrit Sali Berisha.

Në fjalën e tij Bardhi, e cilësoi një zhvillim pozitiv marrjen e logos nga grupimi që ka shumicën në PD. Ai shtoi se kalimi në legalitet i opozitës është një lajm i mirë jo vetëm për demokratët por për të gjithë shqiptarët.

“Nuk kishte asnjë surprizë në vendimin e djeshëm të Gjykatës së Apelit. Nga pikëpamja ligjore kjo çështje mori zgjidhje me vendimin e Gjykatës së Lartë. Gjykata e Apelit nuk ka bërë asgjë më shumë sa ka zbatuar me përpikmëri vendimet e Gjykatës së Lartë. Në aspektin politik, e kam thënë dhe rpërsëritur, PD nuk është çështje e vendimeve të gjykatave është aty ku janë anëtarët e saj. Atë që ka ndodhur dje e konisedorj një akt pozitiv, pasi legaliteti i partisë më të madhe të opozitës është në interesin e publikut dhe në interesin e Shqipërisë. Është një zhvillim pozitiv dhe nuk është një humbje  e disa demokratëve dhe fitore e disa demokratëve të tjerë. Kjo është një fitore e çdo anëtari të Partisë Demokratike dhe çdo qytetari të ndershëm që do që opozita të përmbushë misionin e saj pa kleçka juridike apo çështje të kësaj natyre”, tha Bardhi.

Bardhi tha se detyra kryesore e Partisë Demokratike është të përgatitet për zgjedhjet e ardhshme. Ai deklaroi se çdo anëtar i Partisë Demokratike që ka mbajtur qëndrime kundër shumicës në këtë parti, është i ftuar t’i bashkohet PD-së dhe se kontributi i tij ndër vite do t’i njihet.

“E rëndësishimë nuk është çfarë ka ndodhur në vitin 2022, ishte një shans i humbur mosbashkimi i pjesëve brenda PD në zgjedhjet lokale. E rëndësishme është çfarë do bëjmë në një vit që na ka mbetur deri në ditën e zgjedhjeve. Unë mendoj se secili që ka menduar ndryshe në PD, ta ketë vendin në Partinë Demokratike. Është detyra jonë, e pjesës që është shumicë që të krijojë çdo mundësi që çdo anëtar që ka menduar ndryshe, por që e do PD-në, të përfshihet në strukturat e partisë duke njohur kontributin e tyre, pa asnjë shqetësim se çfarë ka ndodhur deri këto dy vite”, tha Bardhi.

LEXONI GJITHASHTU:

• Berisha merr vulën e PD, demokratët nisin festën! Plasin fishekzjarre në seli
• Gjykata e Apelit i jep vulën e Partisë Demokratike Sali Berishës
• Momenti kur Apeli vendos që vula e PD-së t’i kalojë Berishës, Rithemelimi në festë