“E paimagjinueshme!” Meta për Gerti Bogdanin: Nuk mendoja se do i jepja lamtumirën

Kreu i Partisë së Lirisë, Ilir Meta tha para mediave se i duket e paimagjinueshme që sot po i jep lamtumirën e fundit një personaliteti siç ishte Gerti Bogdani.

Meta e kujtoi Bogdanin si një njeri i cili ka lënë modelin e mirë të politikanit dhe gjithashtu kujtime të mira si shok e bashkëpunëtor.

“Është e paimagjinueshme që sot do të jepja edhe unë si shumë e shumë qytetarë të Tiranë dhe të Shqipërisë, lamtumirën e fundit një personaliteti të njohur publik, nga një familje shumë e njohur dhe me shumë vlera e tradita të Tiranës, i cili ishte model i të rinjve të shkolluar që u kthyen në vend dhe dhanë kontributin e tyre në jetën publike.

Po kështu kam pasur kënaqësinë ta njoh edhe si kryeparlamentar dhe si deputet, veç shumë raporteve të tjera shoqërore dhe personale. Është një moment shumë i rëndë për të gjithë dhe kjo pjesëmarrje tregon tronditjen e opinionit për një ndarje kaq befasuese dhe shokuese. Por të gjithë janë këtu sepse vlerësojnë kontributin e tij, veprat e mira që ai ka lënë, modelin shumë të mirë dhe kujtimet e bukura dhe pozitive që ai i ka lënë familjes së tij, shokëve, miqve e bashkëpunëtoreve”,-tha ilir Meta.

Ish-deputeti Gerti Bogdani ndërroi jetë ditën e djeshme (17.09.2024) për shkak të një ataku kardiak. Ai ishte 44 vjeç.

LEXONI GJITHASHTU:

• Liri Berisha në homazhet për Gerti Bogdanin: Do e kujtojmë me shumë respekt
• Peleshi homazhe për Gerti Bogdanin: Momente të tilla duhet të na bëjnë më të mirë