Hetuesit zbresin në terren për zgjedhje, SPAK publikon planin e masave për 11 majin

Prokuroria e Posaçme Kundër Korrupsionit dhe Krimit të Organizuar ka miratuar një plan masash për hetimin dhe parandalimin e krimeve elektorale në kuadër të zgjedhjeve parlamentare të vitit 2025. Këto masa janë miratuar me urdhër të Drejtuesit të Prokurorisë, Altin Dumani, më 24 janar 2025, në zbatim të Strategjisë së Hetimit dhe Parandalimit të Krimit Zgjedhor.

Masat kryesore të planit:

Ngritja e Task Forcës Hetimore

SPAK ka krijuar një Task Forcë të dedikuar për të monitoruar dhe hetuar krimet zgjedhore. Kjo strukturë përbëhet nga:

• Struktura Qendrore, e cila drejtohet nga Drejtuesi i Prokurorisë së Posaçme dhe përfshin prokurorë, hetues të BKH-së, hetues financiarë, ekspertë dhe staf mbështetës;
• Grupet hetimore në terren, Grupet hetimore në terren do të kenë në përbërje prokurorë, hetues të BKH-së, hetues financiarë, staf administrativ mbështetës, të ndarë sipas 12 Qarqeve dhe 61 Bashkive.

Monitorimi dhe Hetimi Grupet hetimore në terren do të fokusohen në:

• Parandalimin dhe hetimin e veprave penale që lidhen me përdorimin e administratës publike dhe infrastrukturës shtetërore;
• Përfshirjen e grupeve kriminale në procesin zgjedhor

Bashkëpunimi institucional

• Drejtuesi i SPAK ka mandatin për të nënshkruar marrëveshje bashkëpunimi me Prokurorin e Përgjithshëm, Drejtorin e Policisë së Shtetit dhe Komisionerin Shtetëror të Zgjedhjeve. Një hetues i BKH-së do të jetë në kontakt të vazhdueshëm me Komisionin Qendror të Zgjedhjeve për shkëmbimin e informacioneve në kohë reale.Denoncimet dhe

Marrëdhëniet me Publikun

• SPAK do të krijojë një platformë të posaçme për denoncime, e cila do të përfshijë:
• Një numër emergjent;
• Raportime online;
• Një adresë email-i të dedikuar. Informacionet e mbledhura do të konsiderohen informative, ndërsa kallëzime penale do të trajtohen vetëm ato të dorëzuara në mënyrë të rregullt në prokurori.

Monitorimi i Medias dhe Rrjeteve Sociale

• Një grup pune i posaçëm do të monitorojë të dhënat e bëra publike në media dhe rrjetet sociale, të cilat më pas do të përcillen te Struktura Qendrore dhe grupet hetimore në terren.

Monitorimi Financiar

• SPAK do të angazhojë hetues financiarë dhe ekspertë për të monitoruar përdorimin e buxhetit publik dhe investimet gjatë periudhës zgjedhore, duke ndaluar çdo ndërhyrje të paligjshme.

Ftesë për qytetarët dhe institucionet

• SPAK fton qytetarët, institucionet shtetërore dhe private, mediat dhe shoqërinë civile të denoncojnë çdo shkelje që cënon integritetin e zgjedhjeve. Institucioni garanton trajtim të shpejtë, profesional dhe të pavarur të çdo informacioni të marrë.

Veprat penale në juridiksionin e SPAK për krime zgjedhore Në fokus të hetimeve të SPAK do të jenë:

• Korrupsioni aktiv në zgjedhje (Neni 328 i Kodit Penal);
• Korrupsioni pasiv në zgjedhje (Neni 328/b i Kodit Penal);
• Veprat penale zgjedhore të kryera nga grupe të strukturuara kriminale (Neni 75/a, germa b, i Kodit të Procedurës Penale);
• Veprat penale të kryera nga zyrtarë të lartë shtetërorë (Neni 75/a, germa c, i Kodit të Procedurës Penale), përfshirë Presidentin, Kryeministrin, Kryetarin e Kuvendit, ministra, deputetë dhe drejtues të institucioneve kushtetuese.

LEXONI GJITHASHTU:

• Folën në telefon për shit-blerje votash, GJKKO dënon Kristo Agalliun e Agron Durrajn
• “150 mijë pazari i fundit”/SPAK mbyll hetimet për 2 të akuzuar për shitblerje votash