Bie nga kati i 11-të i pallatit, ish-futbollisti i Gabonit humb jetën në Kinë

Ish-sulmuesi i Rapidit të Bukureshtit dhe Gabonit, Aaron Boupendza, ka humbur jetën në moshën 28-vjeçare pas një incidenti tragjik në qytetin Hangzhou në Kinë.

Sipas informacioneve paraprake ai ra nga kati i 11-të i një ndërtese ndërsa autoritetet lokale konfirmuan ngjarjen, e cila ndodhi të mërkurën në orën 1:14 pasdite, kur Boupendza ra nga ballkoni i apartamentit të tij me qira.

Pavarësisht përpjekjeve të shpejta të policisë dhe ekipit mjekësor për ta shpëtuar, ai u shpall i vdekur në spital.

Autoritetet e sigurisë publike të Hangzhou konfirmuan se hetimi i filluar ka përjashtuar mundësinë e një çështjeje penale dhe se ngjarja është trajtuar si një aksident.

Boupendza, i cili ishte pjesë e klubit Zhejiang FC të Superligës kineze që nga fillimi i këtij viti, ka luajtur më herët për FC Cincinnati dhe Rapid București.

Ai u bë i njohur dhe i vlerësuar si një sulmues i fortë, veçanërisht për paraqitjet e tij në Kupën e Kombeve të Afrikës (AFCON) me Gabonin.

Zyrtarët e klubit Zhejiang FC shprehën ngushëllime për humbjen dhe premtuan të bashkëpunojnë me autoritetet për të kryer hetimet e nevojshme.

Po ashtu, Federata Gaboneze e Futbollit (FEGAFOOT) njoftoi për tragjedinë dhe u shpreh ngushëllime për familjen dhe komunitetin futbollistik.

Në një mesazh emocionues, presidenti i përkohshëm i Gabonit, Brice Clotaire Oligui Nguema, shprehu pikëllimin e tij dhe ofroi ngushëllime për familjen e Boupendza.

LEXONI GJITHASHTU:

• Ndahet nga jeta legjenda e futbollit shkodran, Paulin Ndoja
• Ndarja nga jeta e futbollistit në fushë, FSHF reagon për tragjedinë në Tiranë