Arbitri shqiptar do të gjykojë derbin e zjarrtë të Athinës, AEK-Panathinaikos

Arbitri ndërkombëtar shqiptar Enea Jorgji është zgjedhur për të gjykuar njërën nga ndeshjet më të forta dhe më të ndjekura në kampionatin grek, derbin e zjarrtë të Athinës, mes AEK Athens FC dhe Panathinaikos.

Ky takim, i vlefshëm për fazën “Play Off” në “Super League Greece”, do të luhet më 4 maj në orën 19:00 dhe pritet me interes të madh, për shkak të rivalitetit historik mes dy skuadrave.

Caktimi i arbitrit shqiptar në këtë sfidë vjen pas një kërkese zyrtare të Federatës Greke të Futbollit drejtuar Federatës Shqiptare të Futbollit, si dëshmi e besimit dhe vlerësimit që federatat europiane kanë për nivelin e arbitrimit në Shqipëri.

Jorgji është një arbitër i kategorisë A të UEFA-s dhe do të arbitrojë për herë të parë në kampionatin grek ndërsa verën e kaluar, ai arbitroi ndeshjen kualifikuese të PAOK-ut për Ligën e Evropës kundër Shamrock Rovers në Toumba.

40-vjeçari do të ketë në krah asistentët e tij të përhershëm në sfidat ndërkombëtare, Denis Rexha dhe Ridiger Çokaj ndërsa arbitër i katërt do të jetë greku Evangelou dhe në VAR holandezi Van Bekel.

Gjermani Deniz Aytekin do të drejtojë ndeshjen Olympiacos-PAOK.

LEXONI GJITHASHTU:

• Gjysmëfinale dramatike me 6 gola e spektakël, Barcelona dhe Inter ndahen në barazim
• Finalja e Kupës së Mbretit: Madrilenët gati për hakmarrje ndaj Barcelonës