Peshkopia vizitohet me biçikleta, turistët gjermanë shijojnë peizazhet e zonës

Rajoni i Peshkopisë po pret vizitorë të shtuar nga Europa. Të fundit janë një grup turistësh gjermanë, të cilët po e përshkojnë zonën me bicikleta.

Në qytetin e Peshkopisë ka mbërritur një grup turistësh nga Gjermania. Të ardhur nga qytete të ndryshme si, Frankfurti e Këlni, ata janë pjesë e një turi me biçikletë që përfshin destinacione të ndryshme në Shqipëri dhe rajon.

“Shumë mirë, jam shumë e entuziazmuar. Vij nga Frankfurti, në Gjermani, dhe jam këtu prej një jave. Çdo ditë bëjmë udhëtime me biçikletë – kemi qenë në Maqedoninë e Veriut, në liqenin e Ohrit, dhe tani jemi sërish këtu në Shqipëri”, tha turistja nga Gjermania.

Një tjetër turiste shprehet se: “Shqipëria është shumë e bukur. Sapo kemi ardhur dhe duam të eksplorojmë pak qytetin, të vizitojmë dyqanet dhe të blejmë ndonjë suvenir. Në ditët në vijim do të vazhdojmë udhëtimin me biçikletë.”

Me entuziazëm dhe kureshtje, turistët thonë se po zbulojnë bukuritë natyrore, traditën dhe ushqimet vendase.

“Njerëzit janë shumë të sjellshëm. Kur udhëtojmë me biçikletë, për shembull, na lejojnë të kalojmë – makinat ndalojnë për ne, gjë që në Gjermani nuk ndodh gjithmonë. Kemi përshkuar rreth 70 kilometra sot. Ka qenë shumë ngrohtë, por shumë bukur”, tha tursitja.

Për një tjetër zonjë, nuk është hera e parë e saj në Shqipëri, po përsëri është mjaft e kënaqur dhe e impresionuar me vendin.

“Është hera e dytë që vij në Shqipëri. Herën e parë isha në jug të vendit – nga Tirana vazhduam drejt bregdetit dhe u kthyem sërish. Jam nga Göttingen, në Gjermaninë qendrore. Udhëtimi ishte jashtëzakonisht i mirë – organizim perfekt, grup shumë i sjellshëm. E dua natyrën. Notuam gjithashtu – ishte një përvojë e mrekullueshme.”

Vizita e tyre është pjesë e një rritjeje të interesit për turizmin malor dhe alternativ në Shqipëri, veçanërisht në zonat më pak të eksploruara si Dibra. Për shumë prej tyre, kjo është hera e parë në vendin tonë, por jo e fundit. Mikpritja, natyra dhe përvoja pozitive kanë lënë mbresa të paharrueshme. Iniciativa të tilla pritet të japin një shtysë të re në promovimin e turizmit të qëndrueshëm dhe zhvillimit lokal.

LEXONI GJITHASHTU:

• Qiratë e apartamenteve, ekspertët: Sa më shumë investime, aq më lart çmimi
• Shqipëria shënon rënien më të fortë të popullsisë në Europë në dekadën e fundit