Asgjësohen 137 bimë kanabis në tokë publike, një i arrestuar në Malësinë e Madhe

Policia e Shtetit ka vijuar operacionin antikanabis të koduar “Koordinata” në qarkun Shkodër, ku gjatë një aksioni të zhvilluar në fshatin Jubicë, Malësi e Madhe, ka asgjësuar 137 bimë narkotike, të dyshuara si Cannabis Sativa.

Bimët ishin kultivuar në një parcelë toke publike, ndërsa në kuadër të këtij operacioni u arrestua në flagrancë shtetasi I. R., 54 vjeç, banues në fshatin Jubicë, i dyshuar si personi përgjegjës për kultivimin e tyre.

Bimët narkotike u asgjësuan me anë të djegies, ndërsa hetimet vijojnë për identifikimin e personave të tjerë të përfshirë në veprimtari të paligjshme.

Njoftimi i policisë

“Në vijim të veprimeve hetimore dhe operacionale të kryera në kuadër të operacionit policor antikanabis, të koduar “Koordinata”, specialistët për Hetimin e Krimeve të Komisariatit të Policisë Malësi e Madhe arrestuan në flagrancë shtetasin I. R., 54 vjeç, banues në fshatin Jubicë.

Nga hetimet e kryera në bashkëpunim me DVKM Shkodër, dyshohet se ky shtetas ka kultivuar 137 bimë të dyshuara narkotike Cannabis Sativa, në tokë publike, në fshatin Jubicë, vend ku u kap në flagrancë nga shërbimet e Policisë. Bimët narkotike u asgjësuan me anë të djegies.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme”, thuhet në njoftim.

LEXONI GJITHASHTU:

• “Koordinata” në Krujë, dy të arrestuar në flagrancë për kultivim të bimëve narkotike
• “Koordinata”, zbulohen mbi 5999 rrënjë kanabis në Shkodër, procedohen 5 kryepleq