Mourinho rikthehet në vendndlindje, pritet të nënshkruaj me ekipin që nisi karrierën

Mediat portugeze raportojnë se Benfica ka arritur një marrëveshje në parim me José Mourinhon për të marrë drejtimin e skuadrës.

Trajneri portugez shihet si pasuesi i Bruno Lage, i cili u shkarkua të martën pas humbjes surprizë ndaj Qarabagut.

Median bëjnë me dije se palët tashmë kanë rënë dakord mbi pikat kryesore të kontratës, ndërsa detajet e saj janë në proces finalizimi.

Interesant mbetet fakti se pikërisht Benfica ndikoi në shkarkimin e fundit të Mourinhos, teksa humbja e Fenerbahçes ndaj kuqebardhëve në kualifikueset e Ligës së Kampionëve i kushtoi atij vendin e punës. Tani, i njëjti kompeticion evropian solli fundin e epokës Lage dhe hap rrugën për rikthimin e “Special One” në Luz.

Benfica ka një vend të veçantë në historinë e Mourinhos, pasi ishte klubi i parë që ai drejtoi si trajner kryesor në sezonin 2000/2001. Megjithatë, aventura e tij zgjati vetëm 10 ndeshje, duke përfshirë një fitore të thellë 3-0 ndaj Sportingut, ndeshje që rezultoi edhe e fundit e tij në krye të kuqebardhëve.

Pas largimit nga Luz, Mourinho u ngjit me shpejtësi drejt majës së futbollit botëror, duke fituar trofe madhorë me Porton, Chelsea-n, Interin dhe Real Madridn. Përvoja e tij e fundit përfshin drejtimin e Tottenham, Romës dhe Fenerbahçes, ku fitoi Ligën e Konferencës me italianët.

LEXONI GJITHASHTU:

• Nis kompeticioni spektakolar i Champions League, 6 duele interesante
• UEFA pranon kërkesën e Serbisë, ndryshohet stadiumi për ndeshjen ndaj Shqipërisë