A do ketë surpriza në ndeshjen Serbi-Shqipëri? Përgjigjet Sylvinho

Trajneri i Kombëtares shqiptare, Silvinjo, në konferencën zyrtare për shtyp një ditë para përballjes së shumëpritur ndaj Serbisë, e cilësoi këtë ndeshje si më të rëndësishmen deri tani në fushatën e kuqezinjve.

“Të gjitha ndeshjet janë të rëndësishme, por kjo është më e rëndësishmja. Fituam me Letoninë dhe tani kjo ndeshje ka sens. Nëse fitojmë, me Andorrën do të jetë më e rëndësishmja. Janë ndeshje të ndryshme. Besoj se do të jetë një përballje e bukur”, deklaroi Silvinjo.

Ai theksoi se skuadra ka punuar intensivisht gjatë ditëve të fundit në Tiranë, duke u përgatitur për një ndeshje që kërkon përqendrim maksimal.

“Siç e thashë, është një ndeshje e rëndësishme dhe e bukur. Për tre ditë e gjysmë kemi pasur stërvitje në Tiranë. Dje kemi zhvilluar një stërvitje të nivelit të lartë. Nesër do të duhet të zgjedhim lojtarët që do të hedhim në fushë.”-tha trajneri Kombëtares.

Sa i përket mungesës së golave nga sulmuesit, trajneri brazilian u shpreh i qetë dhe optimist.

“Mungesa e golit nuk më mungon nga sulmuesit. Goli është pika e fundit e futbollit. Kam besim që lojtarët do t’i përgjigjen atyre që kemi përgatitur në stërvitje.”-vijoi Silvinjo.

Silvinjo tha gjithashtu se stafi teknik është i informuar mbi mënyrën e lojës së kundërshtarit.

“Në fakt edhe ne e dimë ekipin e tyre. Luajnë me 3 qendërmbrojtës, 2 krahu, 3 mesfushorë dhe 2 sulmues. Nuk mund t’ju them për ndonjë surprizë, por kemi një stërvitje të rëndësishme që na pret pas pak.”-tha Silvinjo.