Mbledhja e kryetarëve të degëve të PD-së, Berisha: Zgjedhjet ishin një farsë

Gjatë mbledhjes me krerët e degëve të Partisë Demokratike, Kryetari i Partisë Demokratike, Sali Berisha, deklaroi se Shqipëria ndodhet në një situatë ku “është instaluar një regjim”.

Berisha akuzoi qeverinë për dhunimin masiv të votës së lirë të shqiptarëve dhe shkeljen e ligjit ndërkombëtar, si dhe për përdorimin e potencialeve të shtetit për të “grabitur votën e qytetarëve”.

“Në zgjedhje u përdorën të gjitha burimet dhe potencialet tashmë të çertifikuara, të dokumentuara. Shpërblimi apo dhurata prej 100 eurosh për pensionistët. Falja e gjobave dhe kamatave prej 200 e sa milionë euro. Rritja me 8 herë e subvencioneve për fshatin. Punësimi i përkohshëm në dhjetëra e dhjetëra raste. Krahas këtyre, ju jeni dëshmitarë se policia politike elektorale e patronazhistëve, në shkelje të ligjit dhe Kushtetutës, u vërsul me egërsi që të kontrollonte vullnetin e zgjedhësve shqiptarë.

Në narkoshtetin e parë dhe të vetëm të Europës, u shpërndanë 183 licenca për të mbjellë 28 mijë hektarë kanabis kundrejt vetëm 200 hektarë që parashikon ligji. Të gjitha këto bënë që vëzhguesit ndërkombëtarë të qëndrojnë me ndershmëri, me integritet në anën e zgjedhësve shqiptarë.

Të gjitha këto janë deklarata të tyre. Të gjitha këto dëshmojnë se zgjedhjet ishin një farsë. Se fusha e garës ishte krejt e pabarabartë. Por po t’u shtojmë këtyre një faktor po kaq madhor sa të gjithë këta të tjerët, kontrollin qeveritar të 90 përqind të medieve, nga i cili qytetarët shqiptarë nuk morën dot informacionin, u mashtruan. Ky kontroll i mediave është një nga armët, dhe ndoshta arma më e rrezikshme e diktaturës autoritare të Edi Ramës ndaj shqiptarëve”, u shpreh Berisha.

LEXONI GJITHASHTU:

• SPAK e thirri për 21 janarin, Berisha: S’më ka ardhur gjë, Rama ka bllokuar hetimin
• Sali Berisha thirret në SPAK për 21 janarin, gazetari Eni Ferhati zbardh detajet