Rama pranon debatet në grupin e PS-së: Janë normale

Kryeministri Edi Rama reagoi ndaj raportimeve për përplasje në mbledhjen e fundit të grupit parlamentar, duke i cilësuar ato të ekzagjeruara dhe të shkëputura nga thelbi i diskutimeve.

Gjatë një takimi me Asamblenë Socialiste të Njësisë 7 në Tiranë, Rama theksoi se mbledhjet mujore fokusohen në çështje konkrete si pronat, reforma në kadastër dhe analiza e reformës administrativo-territoriale, ndërsa debatet e brendshme janë pjesë normale e procesit.

Ai tha se vëmendja është zhvendosur tek detaje periferike, ndërkohë që qytetarët janë të shqetësuar për çështje reale si rritja e çmimeve, veçanërisht ajo e naftës, e ndikuar nga zhvillimet ndërkombëtare.

“Ishte spektakolare, e pabesueshme edhe për mua, që besoj se nuk ka më çfarë më surprizon, që ne mblidhemi në një mbledhje të zgjeruar të grupit parlamentar me qeverinë, që e zhvillojmë çdo fund muaji për të diskutuar tema specifike, për të dëgjuar qeveria deputetët dhe anasjelltas. I kushtojmë orë të tëra çështjes së pronave, shërbimit të kadastrës, ecurisë së reformës në kadastër, etj. Më pas flasim për reformën administrativo-territoriale, ku bashkëkryetari prezanton analizën e bërë gjatë këtyre muajve mbi të dhënat demografike, financiare dhe skenarët. Në vijim zhvillojmë një tjetër sesion për temat e komunikimit dhe për fushatën brenda dhe rreth partisë. Fillojmë në orën 11:00 dhe dalim në orën 18:00, ndërsa mediat kombëtare raportojnë për publikun çfarë i tha Edi Rama njërës dhe çfarë i tha tjetrit. Natyrisht që shqetësimi nuk është ky. Njerëzit kanë votuar dhe duan të dinë gjëra të tjera. Janë të shqetësuar për çmimin e naftës, kjo është jeta reale. Çmimi rritet si rezultat i një lufte që as e kemi hapur ne, as na ka pyetur njeri për ta hapur dhe që është një luftë kundër një vendi ku ka një regjim armiqësor ndaj nesh si Shqipëri”, u shpreh Rama.