Vetingu në RMV, ekspertët: Kujdes, shmangni efektet negative që pati në Shqipëri

Ekspertët e gjyqësorit në Maqedoninë e Veriut bëjnë thirrje që procesi i Vetingut të bëhet me shumë kujdes pasi mund të vihet në situatë kaotike ku do të rrezikoheshin një numër i madh procesesh gjyqësore dhe integriteti i gjykatësve që e kanë bërë punën me nder.

“Nuk është problemi se nuk mund të bëhet vetingu, por se është shumë problematik edhe nga aspekti kushtetues edhe nga ai praktik. Ato modele që i kemi parë deri më tani nuk kanë treguar rezultate serioze. Ka disa principe se gjykatësit kanë më shumë përgjegjësi se të gjithë, dhe kjo është e vërtetë, por mund të vlerësohen vetëm në procedura të drejta dhe vetëm nga gjykatës”, shprehet Malinka Jordanovksa, juriste.

Ish-gjykatësi nga Shqipëria, Ledi Bianku, u tha ekspertëve të Maqedonisë së Veriut që është mirë të diskutohen të gjitha aspektet pozitive dhe negative të vetingut dhe të merret vesh se kush di t’i gjykojë gjykatësit. Bjanku e mori Shqipërinë si shembull negativ për këtë proces.

“Jini ekstremisht të kujdesshëm. Gjithçka varet prej asaj se kush dhe si i gjykon gjykatësit. Kjo do të jetë determinues për suksesin tuaj. Nëse reformat bëhen për qëllime politike, të jeni të bindur se do të dështojnë. Përndryshe, shoh një rrezik dhe rrugë qorre sikur që po ndodhë në Shqipëri”, tha Bianku.

Kishte edhe ekspertë që mendonin se nuk duhet bërë veting fare, por se secili institucion më vete duhet të mësohet të filtrojë ata që nuk e bëjnë punën siç duhet.