Bletaria si traditë familjare në Cërrik, historia e familjes Toska

Në Shtermen të Cërrikut, familja Toska prej dekadash i është përkushtuar bletarisë, një traditë e trashëguar ndër breza. Sot, 43-vjeçari Ermal Toska vijon këtë zanat familjar së bashku me vëllain, duke menaxhuar rreth 700 koshere bletësh.

“Ne kemi shumë vite që merremi me bletë dhe e kemi të trashëguar nga babai. Ai ka rreth 50 vjet që merret me këtë punë dhe na e ka përcjellë edhe ne, mua, vëllait dhe motrës sime. E kemi pasion dhe do mundohemi t’ua trashëgojmë edhe fëmijëve tanë”, thotë Ermal Toska, bletërritës.

Por puna e bletarisë nuk është pa sfida.

“Vështirësitë janë të ndryshme, që nga sëmundjet e bletëve deri te shtegtimet që bëjmë në zona si Erseka, Saranda apo Pogradeci. Problemi kryesor është transporti dhe gjetja e vendeve për t’i vendosur kosheret. Duhet punë e përditshme, duhet kontroll çdo ditë”, thotë ai.

Sezoni aktual konsiderohet ndër më të ngarkuarit për bletarët, pasi kërkon kujdes të vazhdueshëm dhe përgatitje për vitin e ardhshëm.

“Ne merremi edhe me qumështin e bletës dhe bëjmë përgatitjet për sezonin e ri. Duhet të jesh çdo ditë pranë bletëve, t’i kontrollosh dhe t’i menaxhosh, vetëm kështu shmangen problemet”, thotë Toska.

Produktet e familjes Toska nuk mbeten vetëm në tregun vendas, por eksportohen edhe jashtë vendit.

“Shumicën e produkteve e shesim. Eksportojmë në Itali, Angli dhe Greqi”, thotë ai.

Pavarësisht sfidave, familja Toska synon ta ruajë dhe ta përcjellë këtë traditë edhe te brezat e rinj, duke mbajtur gjallë një nga zanatet më të vjetra të zonës.