A do të mbyllet spitali Tepelenës? Banorët: S’shkojmë dot në Gjirokastër për mjekim

Spitali në qytetin e Tepelenës rrezikon mbylljen ndërsa sipas stafit mjekësor buxheti për vitin e ardhshëm parashikon më pak investime duke bërë që të funksionojë si qendër shëndetësore e specializuar ditore. Ky spital iu vjen në ndihmë rreth 50 mijë banorëve të qytetit të Tepelenës dhe fshatrave përreth.

Banorët shprehen të shqetësuar se mundësia e mbylljes së spitalit do të krijojë vështirësi që ata të marrin shërbimin mjekësor, duke rritur edhe kostot ekonomike pasi janë të detyruar që për çdo vizitë mjekësore të udhëtojnë në drejtim të spitalit të Gjirokastrës.

“Ne jemi moshatarë. tani ku të vemi të vizitohemi, ja unë jam me hipertension për tension unë dua të vete një herë në 3-4 ditë të vizitohem në Gjirokastër, ku ti gjej lekët” – u shpreh një grua.

“Sot erdha për veshin që më është bllokuar dhe ti bëj pastrim, hajde bridh nga Gjirokastra e gjen apo nuk e gjen doktorin, kështu që keq është mirë nuk është”-shtoi një tjetër.

“Sa të vete unë në Gjirokastër vdes, ja unë tani dal nga urgjenca, kam qenë me tension të lartë mos kisha këtë ku do të veja, deri në Gjirokastër nuk e arrij dot” – theksoi një burrë.

Mjekët e spitalit I kanë dërguar edhe një kërkesë kryeministrit Edi Rama ku kërkojnë mosmbylljen e spitalit të Tepelenës.

Ndërkohë sipas Ministrisë së Shëndetësisë, spitali i Tepelenës nuk do të mbyllet, por do t’i jepet prioritet disa shërbimeve spitalore të veçanta përshtatur me konfigurimin demografik të zonës.

LEXONI GJITHASHTU: 

• Sekuestrohet arsenal armësh në Kapshticë, një i arrestuar
• Bearbock mesazh Serbisë: Jetoni në paqe me fqinjët, ndryshe bllokohet rruga në BE